Mandati i Kryeministrit/ Sot në orën 15:00, Thaçi takim me Kurtin

Presidenti i Kosovës, Hashim Thaçi sot zhvillon një takim me Kryetarin e Lëvizjes Vetëvendosje, Albin Kurti, ku pritet të diskutohet çështja e mandatit për formimin e qeverisë së re.

Ky takim do të mbahet në Presidencë, duke filluar nga ora 15:00.

Para këtij takimi, Lidhja Demokratike e Kosovës, LDK, do ta mbajë mbledhjen e Kryesisë dhe të Grupit Parlamentar. 

Më 26 dhjetor 2019 është konstituuar Parlamenti i Kosovës, ku Glauk Konjufca është zgjedhur Kryetar, por pa marrëveshje me LDK-në edhe pse deputetët e kësaj partie e kanë votuar Konjufcën. 

Lëvizja Vetëvendosje dhe LDK si parti fituese të zgjedhjeve të 6 Tetorit kanë zhvilluar negociata për një Marrëveshje të koalicionit qeverisës, por postet e Ministrisë së Brendshme dhe Presidentit, shoqëruar me presionin Anti-Vetëvendosje ka bërë që negociatat të dështojnë.