“Mandati i Xhaçkës”, PD padi në Kushtetuese, Bardhi: Bashkëpunëtorët e Bashës kanë ndërhyrë që ai të mos firmos!

Pasi ka dorëzuar padinë e firmosur nga 44 deputetë të opozitës ndaj Olta Xhaçkës në Gjykatën Kushtetuese, Kryetari i Grupit Parlamentar të Partisë Demokratike, Gazment Bardhi, tha se Gjykata Kushtetuese duhet të mblidhet me urgjencë për mandatin e Xhaçkës, që të mos lërë veten të përdhoset nga parlamenti.

“44 deputetë kemi firmosur padinë në Gjykatën Kushtetuesetë Olta Xhaçkës, që mbrohet nga Edi Rama. Kuvendi ka shpallur veten sovran ndaj vendimeve të Gjykatës Kushtetuese. Mbi të gjitha padia ka të bëjë me autoritetin e Gjykatës Kushtetuese. Gjykata Kushtetuese do të duhet të mblidhet me urgjencë dhe të vendosë në vend dinjitetin e përdhosur nga Kuvendi.

Nuk ka ndodhur kurrë që të hidhen në kosh me votë politike vendimet e Gjykatës Kushtetuese. Ndodh për herë të parë, që ndërsa SPAK po heton grabitjen e 11 mijë metër katror tokë nga Olta Xhaçka, Kuvendi refuzon që të zbatojë vendimet e drejtësisë. Deputetët e opozitës nuk lënë çështjet rrugës,” tha Gazment Bardhi ndërsa kishte një përgjigje dhe për Kryetarin e PD të Edi Ramës, Lulzim Basha, i cili kundërshton këtë padi për mandatin e Xhaçkës.

“Zoti Basha, edhe pse s’do të doja të merresha me të, atij i ka hyrë në qejf që të flasë me veten. Zoti Basha nuk ka firmosur as herën e parë për zonjën Xhaçka. Ai i di arsyet. Ai është një nga ata deputetë që nuk ka pranuar as të firmosë për mocionin. Arsyet pyetini. Se kush janë bashkëpunëtorët e tij që kanë miqësi me Olta Xhaçkën që kanë ndërhyrë te zoti Basha për të mos firmosur pro. Basha flet me vete dhe i shkon të flasë me vete,” tha Kryetari i Grupit Parlamentar të Partisë Demokratike, Gazment Bardhi, i cili njeh vetëm një rrugë për zgjidhjen e çështjes së mandatit të Olta Xhaçkës:

“E vetmja rrugë që kërkon të zgjidhë çështjet është Gjykata Kushtetuese. Kushdo që bashkohet me mazhorancën, mund të shkojë tek byrektorja e zotit Basha. Unë nuk di që duke bllokuar Foltoren, i hiqet mandati Olta Xhaçkës. Ne mund të bërtasim sa të duam, kur u mor vendimi, por duhet të bëjmë padi që mandati i Olta Xhaçkës të përfundojë në Gjykatën Kushtetuese. Basha ka refuzuar të nënshkruajë për të dërguar në Kushtetuese mandatin e Xhaçkës.”