Mandati i Xhaçkës, PD: Për llogari të Kryeministrit u goditën hapur anëtarët e Kushtetueses
Sulme të koordinuara të Edi Ramës dhe Erion Velisë ndaj institucioneve të drejtësisë i cilësoi Kryetari i Grupit Parlamentar të Partisë Demokratike, Gazment Bardhi, reagimey e mazhorancës pas skandalit me dosjen 5D në Bashkinë e Tiranës, akuzave të opozitës ndaj vëllait të Kryeministrit, Olsi Rama, për përfshirje në çështjen “Xibraka” dhe trafikun e kokainës, si dhe rastin e fundit me mandatin e Ish-Ministres Olta Xhaçka.
“Shpreh shqetësimin për sulmin e mazhorancës ndaj institucioneve të drejtësisë. Nervozizmi i shtuar i kryeministrit në raport me hallet që e kanë zënë me drejtësinë për shkak të keqqeverisjes dhe korrupsionit, e ka kthyer nga njeriu që gjoja mbështeste drejtësinë në anatemuesin më të madh të këtyre institucioneve.
Që nga dita kur nxorëm faktet mbi të vëllanë, ai i dha mesazh SPAK çduhet të bënte në lidhje me hetimet për përfshirjen e Olsi Ramës me laboratorin e Xibrakës.
Intimidim që nuk duhet të merret në konsideratë nga drejtësia që ka detyrë t’i provojë opinionit publik se nuk intimidohet edhe kur preken njerëz të afërt me Ramën.
Pamë sulm të koordinuar mes Veliaj dhe Ramës ndaj SPAK në lidhje me korrupsionin në bashkinë Tiranë,” tha Gazment Bardhi pas mbledhjes së Grupit Parlamentar të Partisë Demokratike duke folur dhe për kulmin që arriti në Këshillin për Rregullore, Mandatet dhe Imunitetin:
“Dje, për llogari të Ramës, njeriut që ka firmosur investimin strategjik për Xhaçkën, sulmuan hapur anëtarët e Gjykatës Kushtetuese, duke shpallur madje atë që nuk është dëgjuar në 33 vite, se Gjykata Kushtetuese nuk i imponohet dot Kuvendit. Duke zhbërë kështu sistemin demokratik.”
Në fund, për akuzat e deputetit të PD, Lulzim Basha, se po ushtrojnë presion ndaj SPAK, Kryetari i Grupit Parlamentar të Partisë Demokratike tha se Basha po flet vetë me vete.
“Ata janë opozitë e opozitës. Shqipëria ka parë modele të tilla në 33 vite. Vendimi ynë është që kushdo që bën opozitën e opozitës ka vendosur të flasin me veten. Ne i kemi lënë të flasin me veten dhe do vazhdojnë të flasin me veten.
Opozita nuk ka asgjë në dorë që të ushtrojë presion mbi institucionet e drejtësisë, nuk kemi pushtet e nuk kontrollojmë institucionet shtetërore, të vetmit që kanë mekanizma ndaj institucioneve të drejtësisë është pushteti, është kryeministri. Vetëm një njeri i pushtetshëm mund të ushtrojë presion mbi institucionet e drejtësisë,” tha Kryetari i Grupit Parlamentar të Partisë Demokratike, Gazment Bardhi, duke përfunduar:
“Këta flasin për gjëra të përgjithshme, por nuk guxojnë të përmendin emrin e Ramës dhe të Veliajt. Zoti Dumani e tha vetë se nuk marrin informacione nga institucionet për abuzime.”
