“Mandati Xhaçka” në Venecia, Ambasada e SHBA: Të shqetësuar, u shpërfill vendimi i Gjykatës Kushtetuese
Pas votimit të mazhorancës socialiste të Edi Ramës për të mos dërguar çështjen “Mandati Xhaçka” në Gjykatën Kushtetuese, por iu dërgua Komisionit të Venecias për ti kërkuar një mendim, reagimit të Zyrës së Delegacionit të BE në Tiranë iu bashkua edhe Ambasada e Shteteve të Bashkuara në Tiranë, duke shprehur shqetësimin lidhur me vendimin e Parlamentit të Shqipërisë për të shpërfillur një vendim të Gjykatës Kushtetuese.
“Ambasada e SHBA ndan shqetësimin e Delegacionit të Bashkimit Europian lidhur me vendimin e Parlamentit të Shqipërisë për të shpërfillur një vendim të Gjykatës Kushtetuese.
Siç vërejti kohët e fundit Kryetarja e Parlamentit, marrja e hapave të nevojshme për vendimet e Gjykatës Kushtetuese është përgjegjësi qendrore e Parlamentit dhe është gjithashtu jetike për ndarjen e pushteteve,” shprehet Ambasada amerikane në reagimin e saj duke përfunduar:
“Qeveria dhe institucionet duhet të respektojnë rregullat, ligjet, vendimet e gjykatave dhe kushtetutën, të gjitha të cilat janë aty për të siguruar që sistemi demokratik është i shëndetshëm dhe lulëzon.”
Me Vendimin e mazhorancës socialiste të Edi Ramës për të mos dërguar çështjen “Mandati Xhaçka” duke abstenuar, ishte i shqetësuar edhe Delegacioni i BE në Tiranë.
“Ajo çka ndodhi dje nuk është një hap në drejtimin e duhur. Zbatimi i vendimeve të Gjykatës Kushtetuese nga Parlamenti është një çështje thelbësore, pasi lidhet me kontrollet dhe balancat institucionale në sistemin demokratik të vendit,” shprehet delegacioni i Bashkimti Europian në Tiranë e shqetësuar për sundimin e ligjit në Shqipëri dhe vendimet e Gjykatës Kushtetuese që nuk janë zbatuar nga Parlamenti.
“Ne kemi shprehur shqetësimet tona edhe në raportin e fundit mbi Sundimin e Ligjit në Shqipëri, lidhur me faktin që disa vendime të Gjykatës Kushtetuese nuk janë zbatuar nga Parlamenti, përfshirë edhe në lidhje me këtë çështje, ku vendimi i Gjykatës Kushtetuese daton më shumë se një vit e gjysmë më parë (janar 2023),” thekson Delegacioni i BE në Tiranë duke e cilësuar si hap i cili nuk është në drejtimin e duhur, duke përfunduar:
“Na inkurajoi fakti që Kryetarja e Parlamentit, gjatë hapjes së sesionit parlamentar javën e kaluar, theksoi si prioritet nevojën që Kuvendi të ndjekë vendimet e mbetura të Gjykatës Kushtetuese. Ajo çka ndodhi dje nuk është një hap në drejtimin e duhur. Zbatimi i vendimeve të Gjykatës Kushtetuese nga Parlamenti është një çështje thelbësore pasi lidhet me kontrollet dhe balancat institucionale në sistemin demokratik të vendit.”
Ndryshe, ndonëse kryetarja e Gjyatës Kushtetuese Holta Zaçaj është shprehur se askush nuk mund të vendosë të mos ekzekutojë vendimin e Gjykatës Kushtetuese me sqarimin se fuqia e vendimeve të saj është e barabartë me fuqinë e ligjit, pra, të mos zbatosh vendimin e Gjykatës Kushtetuese, do të thotë të mos zbatosh Kushtetutën dhe ligjin, Partia Socialiste vendosi të mos zbatoj vendimin Gjykatës Kushtetuese për të dërguar në këtë Gjykatë mandatin e Xhaçkës pasi Vendimin e hodhi për votim në Parlament, mazhoranca socialiste e të cilit vlerësoi se për këtë vendim ju duhet një mendim i Komisionit Venecias.
