Manfred Weber: Europa e paplotë pa Ballkanin!
Kandidati i partive popullore europiane, EPP, për postin e presidentit të Komisionit Europian, Manfred Weber, tha në Bukuresht se Bashkimi Europian nuk do të ishte i plotë pa pasur edhe shtetet e Ballkanit brenda. Kurse Turqia nuk mund të hyjë në BE, raporton DW.
“Dua të luftoj për një Europë, që njerëzit ta ndjejnë si Europën e tyre. Njerëzit duhet të kuptojnë, që Europa është në radhë të parë për ta, dhe jo për kushedi çfarë strukturash,” tha Manfred Weber në samitin e partive popullore europiane, EPP, në Bukuresht, duke prezantuar vizionin e tij për zgjedhjet evropiane që zhvillohen në maj.
Në këtë takim, ku morën pjesë vendimmarrës lokalë dhe rajonalë para zgjedhjeve europiane në maj, Weber i drejtoi edhe dy mesazhe Europës nga Bukureshti.
Ballkani në BE
Së pari Turqia e sotme nuk përshtatet me BE, tha Manfred Weber. Si president i Komisionit Europian unë do t’i ndërpres bisedimet e anëtarësimit të BE me Ankaranë, theksoi Manfred Weber.
Mesazhi tjetër i kandidatit konservator ishte se: Europa nuk është e plotë pa shtetet e Ballkanit brenda saj!
Kandidati konservator edhe njëherë u distancua nga kryeministri hungarez, Viktor Orban. Të mërkurën e ardhshme kryesia e EVP-së do të vendosë se si do të veprojë me Viktor Orban. Disa parti popullore europiane kanë kërkuar përjashtimin ose pezullimin e përkohshëm të partisë Fidesz të Orbanit.
