Maqedonci: Kosova përmbyll Sharkathonin e parë për dronë

Ministri në detyrë i Mbrojtjes së Kosovës, Ejup Maqedonci, ka bërë të ditu se është përmbyllur me sukses Sharkathoni i parë, ngjarje kjo inovative kushtuar teknologjisë së dronëve dhe zgjidhjeve vendore në fushën e mbrojtjes.

“Bashkë me Drejtorin Ekzekutiv të Odës Amerikane, Arian Zeka, morëm pjesë në këtë ngjarje ku theksuam rëndësinë e nxitjes së inovacionit lokal dhe ndërtimit të partneriteteve strategjike në teknologjinë e mbrojtjes,” u shpreh Ejup Maqedonci përmes rrjetit social Facebook duke theksuar se kjo është vetëm nisma e parë në një sërë aktivitetesh që do të zhvillohen në javët në vijim për të promovuar bashkëpunimin ndërinstitucional dhe investimet në këtë sektor strategjik.

Ndryshe, kjo ngjarje inovative u organizua nga Oda Ekonomike Amerikane në Kosovë, me përkrahjen e Ministrisë së Mbrojtjes, në ambientet e Parkut të Inovacionit dhe Trajnimit në Prizren. Në këtë aktivitet morën pjesë dhjetë zhvillues dhe ekipe të reja, të cilët prezantuan prototipet e tyre të dronëve, duke dëshmuar një potencial të jashtëzakonshëm në rritje në fushën e teknologjisë së avancuar.

Ministri në detyrë i Mbrojtjes së Kosovës, Ejup Maqedonci, ka shprehur mirënjohje ndaj pjesëtarëve të Forcës së Sigurisë së Kosovës, Odës Amerikane dhe drejtuesve të Parkut të Inovacionit për angazhimin dhe mbështetjen në realizimin e këtij projekti të rëndësishëm.