Maqedoni, bisedimet me BE-në, fillon procesi i verifikimit
Më vizitën në Shkup të Komisionerit për zgjerim dhe fqinjësi të BE, Johannes Hahn fillon edhe fillimi i procesit verifikimit të gatishmërisë së Maqedonisë për çeljen e negociatave për anëtarësim në BE.
Komisioneri Hahn me këtë rast vlerësoi se verifikimi i gjendjes do ta ndihmojë vendin që të kalojë nga perspektiva në realitet Evropian.
“Qëllimi është që të verifikojmë se ku gjendeni dhe të krahasojmë legjislaturën tuaj me atë të BE-së. Komisioni Evropian do të verifikoj gatishmërinë tuaj ndaj legjislaturës tonë e cila i kushton rëndësi të veçantë kapitujve mbi sundimin e Ligjit si ai 23 dhe 24,” tha Johannes Hahn.
Ndërkohë Qeveria ka caktuar negociator politik për negociata me BE-në, Bujar Osmanin ndërsa negociator teknik, këshilltarin e kryeministrit, Bojan Mariçiç. Kryeministri, Zoran Zaev u shpreh optimist se vitin e ardhshëm vendi do t’i fillojë negociatat për në BE.
“Konstatuam bashkarisht dinamikën e hapave dhe veprimeve për muajt e ardhshëm dhe filluam me formimin e strukturave të verifikimit dhe negociatave me BE-në nga ana jonë dhe ana e Komisionit Evropian. Në mbledhjen e sotme, komisioneri Hahn më prezantoi planin hyrës të screeningut ndërsa ne sollëm përfundime për fillimin e tij,” tha Zoran Zaev.
Për Marrëveshjen e Prespës, komisioneri Hahn theksoi mbështetjen e fuqishme ndërkombëtare ndaj Maqedonisë dhe Greqisë. Nga ana tjetër Hahn i bëri thirrje të rinjve që të mbështesin referendumin, me qëllim që vendi mos të përfundojë si Britania e Madhe.
Ai i bëri thirrje opozitës që t’i lë anash politikat ditore dhe të punojë për qëllimet dhe interesat kombëtare. Derisa referendumi mbetet në pikëpyetje për shkak të mungesës së KSHZ-së dhe aq më tepër derisa janë theksuar dallimet mes pushtetit dhe opozitës, kryeministri ka ftuar në një takim liderët.
“Sot do të fillojmë me konsultimet për takimin e liderëve, i cili me gjasë do të mbahet të mërkurën në mbrëmje me qëllim që t’i shpejtojmë procedurat për përgatitjet e Maqedonisë për referendumin i cili na pret,” tha Zoran Zaev.
Me fillimin e procesit të verifikimit, Qeveria duhet të formojë 33 komisione në kuadër të institucioneve, për aq kapituj sa janë të hapur. Nevoja për reforma janë theksuar për në administratë, sundimin e ligjit dhe shërbimet e sigurisë. Pas verifikimit, Komisioni Evropian përgatit raport të detajuar mbi bazën e të cilit i rekomandon Këshillit Evropian nëse mund të nisin ose jo negociatat për anëtarësimin e Maqedonisë në BE.
