Maqedoni e Veriut, edhe 173 të infektuar dhe 15 të vdekur nga koronavirusi

Maqedonia e Veriut sot regjistroi 15 viktima nga koronavirusi. Me këtë shifër, që është më e larta brenda një dite që nga fillimi i pandemisë në muajin mars, numri i përgjithshëm i viktimave nga COVID-19 në Maqedoninë e Veriut arrin në 321.

Sipas raportit të Ministrisë së Shëndetësisë, viktimat e fundit janë regjistruar në: Shkup (8), Tetovë (2), Strugë (2), Gostivar (2) dhe Ohër (1).

Në raport thuhet se të gjithë pacientët që kanë vdekur, kanë pasur edhe probleme tjera shëndetësore.

Sa u përket të infektuarve, gjatë 24 orëve të fundit në Maqedoninë e Veriut u regjistruan 173 raste të reja.

Pavarësisht numrit të të infektuarve, raporton RFE, drejtuesit e institucioneve shëndetësore kanë deklaruar se Maqedonia e Veriut ka kapacitete të mjaftueshme për t’u përballur me pandeminë.

Ministri i Shëndetësisë, Venko Filipçe, tha se “lufta” kundër Covid-19 do të ketë sukses vetëm nëse respektohen masat mbrojtëse.

Të dhënat e Institutit të Shëndetit Publik njoftuan të enjten edhe për 150 pacientë të shëruar nga Covid-19.

Numri më i madh i të shëruarve, apo gjithsej 105, u regjistrua në Shkup.

Të dhënat i referohen testimit të 1,653 mostrave, që është numri më i lartë i testeve brenda 24 orëve.

Në Maqedoninë e Veriut, që nga fillimi i pandemisë janë testuar 63,383 persona.