Maqedoni e Veriut, edhe 29 raste, 599 të prekur me koronavirus

Gjatë 24 orëve të fundit janë regjistruar 29 raste të reja: në Shkup 15, në Kumanovë 7, në Prilep 1, në Strugë 3 dhe në Koçan 3, duke e çuar numrin e të prekurve me koronavirus në Maqedoninë e Veriut në 599, raporton RFE.

Betejën me koronavirusin e kanë humbur edhe pesë të prekur me koronavirus duke e çuar në 26 numrin e të vdekurve me koronavirus.

Sipas Ministrisë së Shëndetësisë, viktimat janë dy nga Kumanova, të moshës 52 dhe 53 vjeç, një 65-vjeçar nga Llabunishta e Strugës, një grua e moshës 62 vjeçe nga Tetova dhe një tjetër e moshës 82 vjeçe nga qyteti i Shtipit.

Ministri i Shëndetësisë, Venko Filipçe, tha se beson se sistemi shëndetësor i vendit do të arrijë të përballojë gjendjen me pandeminë, duke theksuar se shëndetësia dhe punonjësit shëndetësorë mbeten shtyllat kryesore në vend.

“E di që për momentin ju po mbani një ngarkesë të madhe. Lodhja po na arrin ngadalë të gjithëve, ndërsa na presin ditë akoma më të vështira përpara. Por, unë besoj se secili prej jush e di se sa e rëndësishme është të vazhdosh, të qëndrosh i përkushtuar, të përqendrohemi dhe të bëjmë çmos për të ndihmuar bashkëqytetarët tanë”, tha Filipçe, në një mesazh dërguar personelit shëndetësor, me rastin e Ditës Botërore të Shëndetësisë.