Maqedoni e Veriut, Pendarovski: Do të jem Presidenti i të gjithëve…

Pasi Komisioni Shtetëror i Zgjedhjeve i Maqedonisë së Veriut e shpalli jozyrtarisht fitues, Stevo Pendarovski bëri daljen e parë si President i ri duke falënderuar të gjithë ata që e votuan, madje falenderoi edhe në gjuhën shqipe të gjithë shqiptarët që e votuan, raporton AlSat.

“Populli im, faleminderit! Ju falënderohem gjithëve maqedonasve, shqiptarëve, serbëve, boshnjakëve, turqve dhe të tjerë që në zgjedhje të drejta dhe demokratike vendosët që bashkë të shkojmë përpara. Kjo sot ishte një fitore e shumicës së qytetarëve të cilët pa dallim bashkësisë etnike dhe politike u bashkua dhe thamë bashkë përpara dhe asnjëherë më regjim. Sot fituan qytetarët, dua të deklaroj se do t’u shërbej me përkushtim të gjithëve,” tha Pendarovski duke garantuar se do të jetë presidenti i të gjithëve dhe se do të jetë faktor i zgjidhjes së problemeve dhe jo i bllokimeve.

“Do të garantoj një të ardhme të barabartë për të gjithë. Këto zgjedhje dhanë edhe një here mesazhin se vetëm së bashku mund të ecim përpara. Këto zgjedhje garantojnë marrjen e dates së hapjeve të bisedimeve në qershor, dhe kjo datë do të merret në qershor. Do të jem faktor i zgjidhjes së problemeve dhe jo i bllokimeve,” tha ai duke i vlerësuar si zgjedhjet më demokratike që ka zhvilluar ndonjëherë Maqedonia që nga pavarësia e vendit ndersa falenderoi edhe kundër kandidatët e tij, Siljanovska dhe Reka.

Por Kryetari i partisë opozitare VMRO-DPMNE, Hristian Micksoki, pas shpalljes së Presidentit të ri tha se profesoresha Gordana Silanovska humbi si pasojë e manipulimeve, falsifikimeve të rënda dhe të shantazheve që bëri në këto zgjedhje LSDM-ja, Zoran Zaevi dhe Stevo Pendarovski.

Ndryshe, Komisioni Shtetëror i Zgjedhjeve i Maqedonisë së Veriut njoftoi se nga votat e numeruara ne 3.436 vendvotime në të gjithë vendin ose 97,84 për qind prej tyre, gjithsej kanë dalë të votojnë 816.649 votues ose 46,64 për qind. Prej tyre, Gordana Silanovska ka marrë 363.980 vota apo 44.57% ndërsa Stevo Pendarovski ka marrë 423.292 vota apo 51.83 %