Maqedoni e Veriut, pjesëmarrja në zgjedhje 50.86%, rezultatet e 60% të votave të numëruara…

Nga përpunimi i rezultateve në 2.274 vendvotime deri në ora 23:00, respektivisht nga rreth 60 për qind e votave të numëruara në zgjedhjet e parakohshme parlamentare në Maqedoninë e Veriut, prin koalicioni “Mundemi” i udhëhequr nga LSDM me 36.78 për qind, VMRO-DPMNE me 35.71 për qind, BDI me 10.34 për qind, dhe koalicioni ASH- Alternativa me 8.16 për qind, raporton Alsat duke shtuar se Partia e Majta ka 4.15 për qind, Integra 1.38 për qind dhe PDSH 1.33 për qind.

Ndërkohë KSHZ e Maqedonisë së Veriut ka raportuar se deri në ora 20:40, kanë votuar 922.678 qytetarë apo 50.86 për qind e votuesve. Dalje më e madhe është regjistruar në Njësinë e katërt zgjedhore kurse dalja më e ulët është regjistruar në njësinë e gjashtë zgjedhore.

Njësia e Parë Zgjedhore 52.17%
Njësia e Dytë Zgjedhore 47.97%
Njësia e Tretë Zgjedhore 57 37%
Njësia e Katërt Zgjedhore 59.79%
Njësia e Pestë Zgjedhore 50.16%
Njësia e Gjashtë Zgjedhore 39.23%

Ndryshe, në zgjedhjet e parakohshme parlamentare të Maqedonisë së Veriut të drejtë vote kishin 1.814.263 votues. U votua për lista kandidatësh për gjithsej 15 koalicione dhe parti.

Në këto zgjedhje, në Zyrën e Avokatit të Popullit ka funksionuar linja telefonike falas 0800 – 54321 ku qytetarët kishin mundësi të denoncojnë shkeljet e të drejtës së votës nga ora 7 deri në orën 21.

Procesin zgjedhor e kanë monitoruar 2.508 vëzhgues vendor dhe 98 ndërkombëtarë të akredituar nga Komisioni Shtetëror i Zgjedhjeve. Për zgjedhjet, përveç gazetarëve të akredituar vendor kanë informuar edhe 55 gazetarë të huaj.