Maqedoni e Veriut, zgjidhen 30 kryetarë të komunave, balotazh i nxehtë ndër shqiptarë

Raundi i parë i zgjedhjeve lokale në Maqedoninë e Veriut përcaktoi vetëm 30 kryetar të komunave, 3 prej të cilave të BDI, 18 VMRO-DPMNE dhe 9 LSDM ndërsa në 40 komuna shkohet në balotazh ku ndër shqiptarë pritet një garë e nxehtë.

Kështu BDI fitoi në tre komuna, ndërsa komunat tjera shqiptare shkojnë në balotazh.

BDI në kuadër të Qytetit të Shkupit ka fituar vetëm Sarajin, ndërsa në Çair shkohet në rreth të dytë mes kandidatit të BDI-së dhe atij të ASH-AAA-së.

Gara më interesante mbetet në Tetovë mes Teuta Arifit të BDI-së dhe Bilall Kasamit të Lëvizjes Besa, ku dallimi në raundin e parë është vetëm 600 vota. Situatë e njëjtë paraqitet edhe në Strugë mes Ramiz Merkos së BDI-së dhe Idri Istrefit të ASH-AAA-së ku dallimi është 1.500 vota. Opozita shqiptare dallim të thellë ka na Gostivar ku kryetari aktual Arben Taravari prin me rreth 3.000 vota kundër Nevzat Bejtës së BDI-së. Beteja në raundin e parë në këtë komunë nuk u përmbyll për dhjetëra vota.

Balotazh në komunat shqiptare:

Tetovë (Bilall Kasami dhe Teuta Arifi)
Gostivar (Arben Taravari dhe Nevzat Bejta)
Çair (Visar Ganiu dhe Bekim Sali)
Strugë (Ramiz Merko dhe Idri Istrefi)

LSDM dhe VMRO-DPMNE

LSDM humbi pothuajse gjitha bastionet socialdemokrate në Maqedoninë e Veriut. Partia e Zoran Zaev nuk fitoi asnjë komunë në kryeqytet përveç Shkupit ku në rreth të parë prin kandidatja e pavarur Danella Arsovska, ndërsa VMRO-DPMNE-ja për momentin ka siguruar katër komuna në rreth të parë dhe prinë në të gjitha komunat tjera me shumicë maqedonase në kuadër të Qytetit të Shkupit, përveç në Qendër dhe Gjorçe Petrov ku procesi shkon në balotazh dhe prinë kandidatët e LSDM-së.

VMRO-DPMNE
Butel
Aerodrom
Gazi Babë
Kisella Vodë

Në raundin e parë, VMRO-DPMNE fitoi 18 kryetarë komunash, ndërsa LSDM 9.

Socialdemokratët shkojnë në balotazh në bastionin historik, Kumanovë. Kandidati i pavarur Maksim Dimitrievski u radhit i pari duke e mundur me një diferencë të ngushtë kandidatin e LSDM-së Oliver Ilievski. Nga komunat historikisht socialdemokrat, partia e Zaev fitoi vetëm Strumicën.

Raundi i dytë i zgjedhjeve lokale do të mbahet më 31 tetor kur do të votohet vetëm për kryetar të komunave.

OSBE-ODIHR: Zgjedhjet të qeta por me probleme teknike

Misioni i OSBE/ODIHR, zgjedhjet lokale të 17 tetorit në Maqedoninë e Veriut, i ka vlerësuar kryesisht të qeta dhe demokratike, por ka regjistruar edhe probleme gjatë votimit, kryesisht me aparatet biometrike për votim, shumë prej të cilëve ishin jashtë funksionit që në nisjen e procesit të votimit.

“Zbatimi i vonshëm i votimit biometrik krijoi sfida plotësuese në realizimin e zgjedhjeve. Dita e zgjedhjeve, përfshirë edhe numërimin e votave u realizua kryesisht mirë, pavarësisht problemeve me votimin biometrik, votimin në grupe dhe disa gabime procedurale gjatë numërimit të votave”, ka deklaruar shefja e misionit të ODIHR-së, Tana De Zulueta.

Sipas saj, “procedurat e votimit në përgjithësi u respektuan, përfshirë edhe masat anti-COVID-19”. Por, vëzhguesit ndërkombëtar kanë vërejtur probleme me fshehtësinë e votës dhe me votimin në grup ose votimin familjar.

“Realizimi i zgjedhjeve u harmonizua me shumë afatet ligjore por mundësia për të përmbushur detyrën u kufizua nga personeli i limituar dhe kapacitetet administrative të kufizuara”, theksuar shefja e misionit të ODIHR-së, Tana De Zulueta.

Ky mision thekson domosdoshmërinë e rishikimit të Kodit zgjedhor, edhe sa i përket financimit të fushatës. Sipas OSBE/ODIHR, dispozitat aktuale ligjore favorizojnë partitë më të mëdha.

Ndryshe, zgjedhjet lokale në Maqedoninë e Veriut janë mbikëqyrur nga 1,100 vëzhguesit vendor dhe 217 vëzhgues nga OSBE-ODIHR.