Maqedoni, Komisioni mbylli debatin për Kodin zgjedhor
Ndryshimet ligjore në Kodin Zgjedhorë kaluan pa shqyrtuar asnjë nga 400 amendamentet e opozitës. Komisioni për çështje Evropiane, me shumicë votash i nisi ndryshimet për miratim. Kreu i Komisionit, Artan Grubi mbylli diskutimin mbi amendamentet për faktin se natyra e propozimit me procedurë të shpejtë, nuk lejon debat më shumë se dyditorë në Komisionin amë. Për miratimin e ndryshimeve në Kuvend, fillimisht do të pritet rezultati i takimit të liderëve.
“Ka mundësi. Akoma mbetet e hapur mundësia për opozitën maqedonase që të kyçet në këtë proces dhe të gjej një ofertë e cila do të mundësojë zgjedhjen e KSHZ-së në përputhje me ligjin por menjëherë dhe pa asnjë vonesë të mëtutjeshme për arsye të afateve. Por nëse takimi i liderëve i caktuar për ditën e hënë dështon në këtë drejtim, atëherë shumica parlamentare do ta ndryshojë Kodin zgjedhorë dhe do të mundësojë zgjedhjen e anëtarëve të KSHZ-së me shumicë absolute prej 61 votash,” tha Artan Grubi, Kryetar i Komisionit për çështje Evropiane.
Kryeministri Zoran Zaev, ka caktuar vazhdimin e takimit të liderëve për mëngjesin e të hënës. Ndërkohë, Kuvendi pritet që po në të njëjtën ditë në seancë plenare t’i vendos ndryshimet në Kodin zgjedhor.
Në rast se liderët merren vesh për KSHZ-në, do të hiqet dorë nga ndryshimet e propozuara në Kuvend. Më 17 korrik Qeveria propozoi ndryshime në Kodin zgjedhorë më qëllim zhbllokimin e zgjedhjes së anëtarëve të KSHZ-së, procedurë kjo e cila aktualisht ka ngecur në Komisionin për zgjedhje dhe emërime. Ndër ndryshimet e propozuara është zgjedhja e anëtarëve të KSHZ-së me vetëm 61 vota në vend se me 2/3 si dhe përzgjedhja të mos kalojë nëpër Komisionin për Zgjedhje dhe Emërime me të cilin udhëheq VMRO-DPMNE-ja.
Për zhbllokimin e procesit, opozita kërkon miratimin e Ligjit për financimin e partive politike dhe Ligjit mbi Qeverinë ku opozita kërkon favoret që LSDM-ja i kishte kur ishte në opozitë, Qeveri teknike, ministra dhe zëvendësministra me të drejtë veto. Takimin e radhës, liderët do të diskutojnë për KSHZ-në dhe modalitetet e referendumit.
