Maqedonia dhe Greqia përcaktojnë kornizën për marrëveshjen rreth emrit

Arrihet një kornize për marrëveshjen me Greqinë për çështjen e emrit të Maqedonisë. Këtë e ka bërë të ditur Ministri i Punëve të Jashtme i Maqedonisë, Nikolla Dimitrov për agjencinë maqedone të lajmeve, MIA, pas takimit në Bruksel me shefin e diplomacisë greke, Nikos Kotzias.

“Kishim takim produktiv, kemi kornizë që duhet të përpunohet dhe momentalisht grupet e juristëve të të dy ministrive po punojnë për përmbajtjen e saj. Planifikohet një takim i rëndësishëm në nivel të kryeministrave, Zaev dhe Tsipras nga mesi i javës. Besojmë se do të përcaktojnë disa punë të rëndësishme nga opsionet që janë në lojë”, deklaroi Dimitrov pa dhënë detaje mbi përmbajtjen e kornizës.

Dimitrov,sot kishte një takim joformal me ministrat e punëve të Jashtme të BE-së. RFE raporton se Franca dhe Holanda kanë mbajtur qëndrimin e fortë për mosdhënien e datës për nisjen e bisedimeve, ashtu edhe siç pritej. Por, Dimitrov ka thënë se “janë të mundshme çudira”.

“Është e bukur të dimë se kjo nuk është punë e thjeshtë. Konsolidimi i brendshëm i BE-së është komplementar dhe jo në kundërshtim të konsolidimit të Ballkanit…Nuk jemi në situatë që të kemi luks dhe të lëshojmë shansin historik”, ka deklaruar Dimitrov.

Zyrtarët e lartë të Bashkimit Evropian kanë njoftuar për progres në bisedimet për zgjidhjen e kontestit.

“Të gjithë jemi shumë të inkurajuar nga përparimi mes Shkupit dhe Athinës për emrin. Të gjithë do të punojmë që të mbështesim një epilog pozitiv”, ka deklaruar shefja e politikës së jashtme e Bashkimit Evropian, Federica Mogherini.

Edhe komisioneri për zgjerim, Johanes Hahn ka mirëpritur kthesën pozitive në procesin e bisedimeve duke theksuar se kjo do të ndihmonte procesin e integrimit euroatlantik të Maqedonisë.

Bisedimet në Bruksel, pasojnë ato në New Yorkut ku dy palët nuk arritën progres pasi Greqia hodhi poshtë propozimin, “Maqedonia e Ilindenit”.