Maqedonia e Veriut feston 28 vjetorin e pavarësisë
Maqedonia e Veriut sot shënon 28-vjetorin e pavarësisë nga Ish-Republika Socialiste Federative e Jugosllavisë përmes një referendumi popullor, i cili e shpalli atë shtet të pavarur dhe sovran.
Sipas vlerësimeve shtetërore të asaj kohe, mbi 95 për qind të qytetarëve që dolën në referendumin e 8 shtatorit të vitit 1991, iu përgjigjën pozitivisht pyetjes së referendumit “A jeni për Maqedoni të pavarur me të drejtë të hyjë në fuqi në aleancën e ardhshme të shteteve sovrane të Jugosllavisë”.
Referendumit i parapriu Deklarata për Pavarësi, të cilën Parlamenti i parë i Maqedonisë pluraliste e miratoi më 25 janar të vitit 1991. Formalisht, vullneti i popullit për shtet të pavarur ishte konstatuar me Deklaratën për pranimin e rezultateve të referendumit më 18 shtator të vitit 1991 në Kuvendin e Maqedonisë.
Hap i ardhshëm me rëndësi në përforcimin e shtetit ishte miratimi i Kushtetutës së re më 17 nëntor 1991. Dhjetë vite më vonë Kushtetuta u plotësua pas konfliktit të vitit 2001 dhe nënshkrimit të Marrëveshjes së Ohrit.
Shtetësinë e Maqedonisë e para e njohu Republika e Bullgarisë, pasuan njohjet nga Turqia, Sllovenia, Kroacia, Rusia, Bosnje Hercegovina…
Subjektiviteti ndërkombëtaro-juridik i shtetit u konfirmua më 8 prill të vitit 1993, kur me aklamacion në Asamblenë e Përgjithshme të Kombeve të Bashkuara, Maqedonia u pranua si anëtare e 181-të në Organizatën e Kombeve të Bashkuara. Mirëpo për shkak të kundërshtimeve dhe presioneve të Greqisë, e cila nuk e pranon emrin kushtetues të Maqedonisë, anëtarësimi në OKB u bë nën referencën e përkohshme Ish-Republika Jugosllave e Maqedonisë.
Nën kujdesin e OKB-së , Shkupi dhe Athina filluan bisedimet për zgjidhjen e problemit dhe përfundimisht pas negociatave shumëvjeçare, më 17 qershor të vitit 2018 në Prespë u nënshkrua marrëveshje mes të dy vendeve për zgjidhjen e kontestit me emrin, ku shteti përfudnimisht mori emrin Maqedonia e Veriut.
Maqedonia e Veriut u favorizua shumë nga Brukseli zyrtar në rrugëtimin euro-atlantik, dhe sot kur Bullgaria dhe Greqia janë qetësuar duke ju plotësuar kërksat e tyre absurde, shqiptarët në këtë shtet edhe pse komb shtetformues vazhdojnë me Marrëveshjen e Ohrit nga viti 2001 të kërkojnë të drejtat e tyre elementare.
