Maqedonia e Veriut, zyrtarisht anëtare e NATO-s

Maqedonia e Veriut, sot është bërë anëtarja më e re e NATO-s. Aleatët e NATO-s e kanë nënshkruar Protokollin e Pranimit të saj në shkurt të vitit 2019 dhe pastaj të 29 parlamentet kombëtare kanë votuar për të ratifikuar anëtarësimin.

Duke e pranuar Maqedoninë e Veriut si anëtare të 30 të familjes në NATO, raporton RFE, Sekretari i Përgjithshëm i NATO-s, Jens Stoltenberg, sot në Bruksel u shpreh:

“Maqedonia e Veriut është tani pjesë e familjes së NATO-s, një familjeje prej 30 anëtarësh dhe gati një miliard njerëzish. Pa marrë parasysh sfidat me të cilat përballemi, ne të gjithë jemi më të fuqishëm dhe më të sigurt së bashku.”

Ndërkohë ceremonia e ngritjes së flamurit të Maqedonisë së Veriut është planifikuar të zhvillohet në selinë e NATO-s në Bruksel, më 30 mars.