Marksist-leninistët e listave të hapura!
nga Agim Popoci
Të hapen listat 100%! Kjo ishte rrufe në qiell të hapur jo vetëm për Kryeministrin Edi Rama por edhe për shumë kritik të Lulzim Bashës që e akuzonin për çdo veprim, dhe së fundi hodhën një lum akuzash pse ai nuk lejon hapjen e listave!
Sot, kur procesi i kandidimit për deputet nga baza vazhdon, hapja e listave është një element shtesë demokratik që lenë shumë kritik të pakorrigjueshëm por dhe dështak, pa ushqimin për të fajësuar vetëm liderin për dështimin e partisë në zgjedhje. Dhe jo vetëm kaq!
Në këtë vorbull politike shqiptare na dalin ca që kundërshtojnë edhe listat e hapura duke banalizuar dhe propozimin e Lulzim Bashës ndërsa propagandojnë vetëm politikën e Likes mbi rëndësinë e koalicioneve! Pa thelb, pa përmbajtje, si marksist-leninist, propagandojnë se hapja e listave nuk ka fare rëndësi madje dhe dëmton garën sepse në pushtet futen ata që kanë para, dhe ata lapangjozë që politika bastarde i quan dhe oligarkë.
Fillimisht, marksist-leninistët duhet të kuptojnë se hapja e listave në radhë të parë i shërben qytetarit i cili e din se kujt po i jep votën; së dyti, rrit angazhimin e çdo deputeti në listë pavarësisht nëse është nr.1 apo 140 në listë; në fund, gara na identifikon përgjegjësinë dhe vendin e plagës, që do të shërbejnë për çdo parti në procesin postzgjedhor!
Janë këta tre elementë të listës së hapur që ajo e mbyllur jo vetëm që nuk i ka por e rëndon edhe më shumë pozitën e liderit të partisë.
Listat e mbyllura kanë shkëputur qytetarin nga deputeti ndërsa sistemi i fundit zgjedhor që na e dha peshqesh Edi Rama, e ka shkëputur fare edhe nga realiteti shqiptar. Çdo kandidatë për deputet, luftën e vetme elektorale që e ka bërë ishte për renditjen në parti, gjithçka tjetër ishte e parëndësishme. Madje në zgjedhjet e fundit u bastardua edhe Shkodra si bastion i sigurt demokratik ku u hap gara për pozicionimin në pjesën e sigurt të listës!
Te listat e hapura gjithçka ndryshon! Kandidatët për deputet synojnë që në bankën e tyre të çojnë sa më shumë vota ndërsa e kanë parasysh vlerën maksimale por dhe atë minimale që mund të ketë banka qendrore, partia. Kjo bënë, që kandidatët, përveç se më të përgjegjshëm, të jenë më të interesuar për votën e tyre e cila do të vijë në shprehje vetëm kur të konstatohet se cili është kapitali politik që kanë fituar në zgjedhje!
Sa për oligarkët dhe të pasurit! Me lista të mbyllura, të hapura ose të shqyera, grupet e interesit gjithmonë do të kenë deputetët e tyre në parlament, pavarësisht nëse listën e bënë Rama ose Basha, meqë Likja me sh.a.-në e tij këtu bënë përjashtim!
Por marksist-leninistët duke bërë një kapërcim me shkeljen e hapjes së listave kalojnë tek koalicionet ndërsa harrojnë se kuptimin më të madh listat e kanë kur fitojnë garën dhe marrin formën përfundimtare bazuar në suksesin e kandidatëve me votat e fituara.
Fitorja me koalicion e Opozitës së Bashkuar kundër Edi Ramës mund të jetë më e lehtë, nuk e diskutohet, por nëse kandidatët e PD futen në garë me shpresën se fiton LSI për të marr pushtetin, atëherë nuk ka listë në botë që u ndihmon.
Iniciativës së Lulzim Bashës me kandidatët nga baza dhe tashmë hapjen e listave, nuk është se i duhen me patjetër koalicionet për të fituar garën e cila mund të konsiderohet e pabarabartë vetëm pse përballë ka një parti kriminale në pushtet. Por, nëse futet në garë për të fituar 50% plus 1 votë, atëherë kot që hapen listat edhe nëse ruhen koalicionet.
Në tri zgjedhjet e fundit parlamentare, 50% e qytetarëve nuk dolën fare në zgjedhje dhe natyrisht nuk ishin as listat dhe as koalicionet që i lanë ata të zhgënjyer, por, klasa politike. Ky është dhe burimi i pashteruar i votave ku duhet të synoj një parti që nuk vjedhë dhe nuk blenë votat por mendon t’ia shtoj bankës së saj të votave të sigurta edhe këtë pjesë të pabindur në mënyrë që të korr fitore.
Marksist-leninistët janë mësuar të bashkojnë gjithë proletarët por pas 8 vjetëve shkatërrimtare të Edi Ramës, Partia Demokratike duhet të futet në garë për të fituar e vetme pa harruar paktin që ka bërë me Aleatët e saj në opozitë, që mund të realizohet edhe me një Marrëveshje parazgjedhore për koalicion qeverisës!
Nëse Partia Demokratike futet në garë për të korr fitore me LSI-në kjo nuk e bënë në asnjë mënyrë fituese të pushtetit, si para zgjedhjeve ashtu dhe në rast se arrin të krijon koalicionin qeverisës. Kjo u dëshmua edhe në vitin 2013 kur Likja thjeshtë iku nga koalicioni qeverisës ndonëse kishte përfituar shumë nga pushteti i Doktorit!
Dhe në fund, nëse një parti serioze si PD arrin të hartoj një Plan Ekonomik për ekonominë të cilën e ka katandisur si mos më keq Edi Rama, mund të hartoj edhe një strategji për të bindur të paktën 10% të 50 për qindëshit të zhgënjyer nga politika që nuk dalin në zgjedhje, se një epokë e ndryshimit po vjen; Sukses ky i cili do të jep më shumë vota se sa një Koalicion me Liken në gjunjë dhe shqiponjën e tij!
