Marku nuk paraqitet në Vetting/ Përfaqësuesi i ONM i zhgënjyer: Prisja të jepte shpjegime për…
Kryeprokurorja e Përkohshme e Përgjithshme, Arta Marku, nuk ka qenë sot e pranishme në seancën e KPK-së për Vettingun, ndërsa është përfaqësuar nga avokatja e saj.
Kjo mungesë e Markut në seancën për Vettingun duket se ka zhgënjyer jo vetëm trupin gjykues, por edhe vëzhguesin e ONM-së, Teo Jacobs. Ky i fundit ka shprehur keqardhjen për mungesën e Markut në seancë, teksa ka dashur të bëhej debat për një nga cështjet e ngritura në seancë, që i referohet kohës që zonja Marku ka qenë prokurorë në Shkodër në vitin 2016 dhe ka kërkuar arrest me burg per nje shtetas me inicialet A.B. qe akuzohej për drejtim mjeti në menyre te parregullt. Kjo masë vlerësohet si ekstreme, tha relatorja.
Ndërkohë, avokatja e Markut tha se i qëndrojmë gjetjeve të KPK nuk kemi kundërshti.
Debati
Kryesuesja Genta Tafa Bungo: Dua të di arsyet e mungesës së zonjës Arta Marku në seancë.
Avokatja: Zonja Marku e pa të arsyeshme që unë të ndodhesha këtu në vend të saj.
Perfaqësuesi i ONM Jacobs: Jam i zhgënjyer që nuk është e pranishme. Doja të bënim një debat. Dua të bej disa komente për një nga çështjet që u diskutua këtu. Unë shoh që në këtë çështje ku një drejtues është ndaluar teksa drejtonte mjetin në gjendje të dehur, kur subjekti ishte prokurore. Unë nuk e mbështes konsumin e alkoolit teksa drejton mjetin, por subjekti Arta Marku ka vite që është prokurore, besoj se ajo e bën dallimin mes kriminelit dhe shkelësit të ligjit. Jo çdokush që shkel ligjin është kriminel. Në Belgjikë dhe në Itali ata që përfundojne në paraburgim me shumë mundësi edhe dënohen. Këtu në Shqipëri vetëm një përqindje e vogël e atyre që janë në paraburgim marrin dënim me burg, ndaj është shumë e rëndësishme që të argumentohet hollësisht pse një person duhet të qëndrojë në burg teksa hetohet. Unë ndaj doja të kisha sot atë këtu që të debatonim profesionalisht.
Avokatja e Markut: Jam dakord me komentet e vëzhguesit ndërkombëtar. Bazuar në ligj, një nga qëllimet që caktohen masat e sigurimit, ose kur kryhet arresti në flagrance, një nga qëllimet që vendoset masa e sigurimit, parandalimi i përgjithshëm i kryerjes së mëtejshme të veprave penale, në këtë vështrim, edhe pse drejtimi i mjetit në gjendje të dehur është formale, nëse gjendemi përballë rrethanave të përsëritjes së veprës penale, nga prokurori si subjekt që kërkon masë sigurimi konsideron të përshtatshme caktim masë sigurimi të tillë me efekt parandalimin e kryerjes së një vepre tjetër penale siç mund të jenë aksident me pasoja fatale. Jam dakord me konstatimin e vëzhguesit që gjykatat caktojnë me shumë masa me burg në Shqipëri, por duhet ti bëj me dije se është prokuroria që kërkon këto masa dhe vendimin e merr gjykata.
Jacobs: E kisha fjalën që prokurori duhet të sillte prova dhe shpjegime pse duhet të rrinte në burg personi, pse rrezikonte të kryente aksident, duhet ta provonte një gjë të tillë. Ajo që vlerësoj te ajo është që i arrestuari nisi gjyqin shumë shpejt, pra dy javë pas arrestimit. Por masa e sigurisë nuk është e argumentuar me prova.
Pas kësaj, avokatja kërkoi rikonfirmimin në detyrë, teksa kryesuesja tha se seanca rifillon nesër në orën 10:00.
