Marrëveshja Bazë, Kurti: Nuk mund të zbatojmë vetëm ato që dëshiron Serbia. Kjo logjikë ka vdekur

Sot Kryeministri i Kosovës, A;bin Kurti, doli për të sqaruar gjithçka ndodhi më 14 shtator në Bruksel në takimin me Presidentin e Serbisë, dhe po aq ngeli e pasqaruar nga mediat kosovare disa prej të cilave madjej nuk e pasqyruan fare përveç se merakun që kishin pse Kurti nuk e don Lajçakun.

Por, pavarësisht se çfarë mendojnë pronarët e mediave kosovare, Kryeministri i Kosovës e tha qartë se ose do të zbatojë Marrëveshjen Bazë në tërësi ose nuk mund të zbatojmë vetëm ato që dëshiron Serbia, kjo logjikë ka vdekur.

”Gjithëpërfshirjen për të zbatuar secilin nen e përcakton edhe vet aneksi i implementimit i miratuar në Ohër. Aty në atë aneks përcaktohet në tri klauzola specifike, që çdo nen i Marrëveshjes Bazike duhet zbatuar dhe palët nuk mund të shprehin obstruksione në asnjë prej tyre,” tha Albin Kurti duke sqaruar se në takimin e parë me Përfaqësuesin e Lartë për Politikë të Jashte dhe Siguri, Josep Borrell, dhe të dërguarin e posaçëm të BE për dialogun Kosovë-Serbi, Miroslav Lajçak, iu kërkua që të kalohet menjëherë në procesin e negocimit të statutit të përcaktuar me Nenin 7 të Marrëveshjes Bazë, në lidhje me zbatimin e Nenit 10.

Me këtë rast, tha Kurti, ju bëri të qartë ndërmjetësuesve se një hap i tillë nuk mund të ndërmerret pa u dakorduar për një plan të qartë të sekuencimit, duke pasur parasysh faktin se Vuçiq ka kohë që deklaron se nuk ka pranuar marrëveshjen me Kosovën dhe se do të zbatojë vetëm ato që përputhen me vijat e kuqe të Serbisë.

“Të thuash se një marrëveshje meriton të zbatohet vetëm në gjysmën e saj është e njëjtë sikurse të thuash se marrëveshje duhet mbytur. Prandaj, unë nuk e pranova një skenar të tillë sepse për mua dhe Këshillin Evropian një marrëveshje e tillë ekziston dhe nuk mund të zhbëhet nga askush. Pasi përfunduan takimet dhe pas daljes sime në media, ku ekspozova këtë skenar të pakuptimtë, në të cilin synimi është të mbysësh tërë Marrëveshjen Bazike përveç Asociacionit, ndërmjetësi lëshoi për media një dokument sekuencimi për të cilin tha se Vuçiçi e pranoi, e Kurti e refuzoi. Një informacion i tillë është tërësisht i pavërtetë. Shtuar këtu se në atë plan të Lajçakut zbatohet pikërisht ajo çfarë Serbia kërkonte në dokumentin e saj”, tha Kurti duke vlerësuar si katrahurë informacionin e dalë nga zyra e Lajçakut ndërsa paralajmërimet e Vuçiçit u përputhen me ato që më pas tha ndërmjetësi.

“Ata kanë shkuar shumë larg me goditjen kundër Kosovës. Me situatën që jemi vlerësoj që nuk mund të shtrembërohen gjërat me asnjë hedhje të hirit syve. Ose do të zbatojmë Marrëveshjen Bazike në tërësi të saj ose nuk mund të zbatojmë vetëm ato që dëshiron Serbia. Kjo logjikë ka vdekur dhe një Republikë e pavarur e Kosovës nuk mundet, nuk duhet dhe nuk do të ecë në një shteg të tillë.”

Ndërkohë Kryeministri i Kosovës mendon se shetnsionimi i situatës në veri të Kosovë ka ndodhur dhe masat e BE duhen hequr.

“Deeskalimi në masë të konsiderueshme ka ndodhur, ka 2 muaj që s’ka incidente e as protesta të dhunshme. Adresa për rieskalim s’është në Prishtinë, por në Beograd e në hotelin Kopaonik andej kufirit. Deeskalimi do të duhej të ishte i mjaftueshëm për të rimenduar heqjen e masave,” tha Albin Kurti duke bërë të ditur sot se më datën 15 shtator i ka dërguar letër sqaruese Parisit, Berlinit, Romës dhe Washingtoni.

 “Nga Parisi dhe Berlini kam konfirmimin se janë pranuar ato. Nuk është çështja BE-SHBA këtu, kemi të bëjmë me një emisar evropian që e ka deformu procesin. Ky deformim i procesit të zbatimit është i shoqëruar edhe me një padrejtësi që për bindjen time është fondamentale. Sa herë ka shkelje të marrëveshjes do të duhej që arbitri t’i bie pipit. Cili është kuptimi që ne merremi vesh për një tekst e pastaj me deklarata e shkelin marrëveshjen e arbitri nuk reagon.”