Marrëveshja e detit me Greqinë/ Rama flet nga Saranda: Kemi bërë gjënë e duhur, por…
Kryeministri Edi Rama ka komentuar nga Saranda zhvillimin e negociatave mes Shqipërisë dhe Greqisë për marrëveshjen e detit dhe çështje të tjera mes dy vendeve. Komentet e Ramës vijnë në një kohë kur në Rodos, ministrat e Jashtëm, Nikos Kotzias dhe Ditmir Bushati, po zhvillojnë bisendime intensive për përmbylljen e marrëveshjes, për të cilën mediat greke, kanë paralajmëruar se do të firmoset nga Kryeministrat e dy vendeve, Edi Rama dhe Alexis Tsipras në datat 28-29 qershor në Bruksel, gjatë samitit të BE-së.
“Marrëveshja për detin do materializohet vizualisht në harta. Do kenë mundësi të gjithë që me mendjen e tyre e jo te partive, apo atyre që përcjellin lajme të rreme të gjykojnë midis pamjes së detit në marrëveshjen që ishte dhe që do të kemi.
Kufirit që ishte dhe kufirit që do te kemi .Jo vetëm që kemi bërë marrëveshjen e duhur, por kemi treguar edhe çfarë janë në gjendje të bëjnë këta të dëshpëruar që s’kanë as ide, as program, as skuadër dhe gjithë pafuqinë e tyre që të qenurit një alternative qeverisëse po e kthejnë në një fuqi destruktive, duke luftuar kundër çeljes së negociatave”, tha Rama.
Në kuadër të turit të llogaridhënies, Rama theksoi se bisedimet me Athinën kanë kaluar nëpërmjet një tensioni të jashtëzakonshëm dhe shtoi qe qeveria e drejtuar prej tij po përpiqet të korrigjojë të gjitha marrëdhëniet e tensionuara që janë krijuar pas rënies së regjimit komunist.
“Jemi investuar për të ndërtuar një marrëdhënie afatgjatë strategjike me Greqinë. S’ka qenë e thjeshtë, ka kaluar nëpërmjet një tensioni të jashtëzakonshëm, jo sepse e kemi pasur për qëllim të prishin marrëdhëniet me Greqinë, por të korrigjohen të gjitha marrëdhëniet që janë krijuar pas ndryshimit të sistemit, vatrat e tensionit, duke na dalë përpara rrugët e së ardhmes…
Për ata që i njohin ngërçet që kjo marrëdhënie ka pasur, që peshojnë peshën e këtyre ngërçeve në procesin e bashkëpunimit dhe ndërveprimit me fqinjët, kuptojnë se hapat që kemi hedhur janë historike. Është historike që Greqia e ka njohur si fakt ligjin absurd të luftës dhe ka pranuar ta shfuqizojë.
Kur kemi nisur këtë diskutim as e njihnin si fakt. Por, e vërteta është se është një fakt shumë pengues me pasoja juridike sot e gjithë ditën që do zhbëhet nga parlamenti i Greqisë.
Është një fakt edhe që për shumë e shumë vite emigrantet shqiptar në Greqi kanë pasur vështirësuara të shumta burokratike dhe u janë kursyer më shumë se 5.000 euro në vit nga vendosja e një regjimi të ri nga marrëdhënia e tyre me burokracinë”, shprehet Rama.
