Marrëveshja e ekstradimit me SHBA, Yuri Kim: Godet kriminelët që fshihen pas kufijve!
Ambasadorja e Shteteve të Bashkuara në Tiranë, Yuri Kim, duke vlerësuar firmosjen e Marrëveshjes së ekstradimit mes SHBA dhe Shqipërisë, tha se kjo godet kriminelët që fshihen pas kufijve.
“Është nder i madh për mua që të nënshkruajmë këtë traktat, mes SHBA dhe Shqipërisë, që është dëshmia e fundit e partneritet mes dy vendeve. Ky traktat u nënshkrua 87 vite më parë, në 1 mars 1933. Kjo ishte një kohë kur Shqipëria ishte Mbretëri, dhe jo Republikë. Ky traktat siguron një kornizë për t’u përballur me krimin. Ky traktat siguron një armë të fuqishme për t’i dhënë fund pandëshkueshmërisë së kriminelëve, që fshihen pas kufirit. Personat e kërkuar për ndjekje penale për një krim të ekstradueshëm do të dorëzohen sipas kushteve të këtij traktati. SHBA ka luajtur rolin si një partnerë efikase. Sa më efikase të jetë Shqipëria për të ndjekur krimin ndërkombëtar, do të jetë afër integrimit,” tha Ambasadorja amerikane Yuri Kim duke siguruar se SHBA do të jenë afër Shqipërisë, pavarësisht sfidave që përballet ndërsa përfundoi:
“Mbështesim punën e Prokurorisë së Posaçme. Ne po punojmë dhe me BKH, duke ndihmuar në zgjedhjet më të mira, për të gjetur hartuesit me të mirë. Suksesi i SPAK nuk është vetëm çka SHBA presin, por është edhe ajo që shqiptarët duan. Vlerësoj marrëveshjen e ekstradimit mes vendeve dhe shpresoj se do të zbatohet shumë shpejt. Partneriteti ynë është jetë gjatë, miqësia jonë është e përhershme.”
Ndërsa ministrja e Drejtësisë, Etilda Gjonaj, pas firmosjes tha se me këtë Marrëveshje realizojmë përditësimin dhe kategorizimin e veprave penale mbi bazën e të cilave kërkohet ekstradimi.
“Një hap i rëndësishëm përpara në luftën kundër krimit. Marrëveshja shërben si një sinjal i qartë dhe i vendosur ndaj të gjithë shkelësve të ligjit, se askush nuk do të gjejë asnjë strehë për t’iu shmangur zbatimit të ligjit penal në SHBA apo në Shqipëri. Akti që formalizojmë sot përmes këtij nënshkrimi, është shenjë e qartë e vullnetit të palëkundur të qeverisë shqiptare, në drejtim të zbatimit të ligjit dhe forcimit të shtetit të së drejtës,” tha Gjonaj duke përfunduar:
“Por, edhe provë e mbështetjes së pakursyer të mikut dhe aleatit tonë, Shteteve të Bashkuara të Amerikës, në realizimin e këtij objektivi të përbashkët.”
Nëceremoninë e fimrosjes së Marrëveshjes së esktradimit mes SHBA dhe Shqipërisë e cila u zhvillua në Pallatin e Brigadave ishin të pranishëm edhe Prokurori i Përgjithshëm, Olsian Çela, kreu i SPAK, Arben Kraja, drejtues të institucioneve të drejtësisë dhe përfaqësues të ambasadës.
