Marrëveshja, Kosova dhe Maqedonia e Veriut me pika të përbashkëta kufitare

Firmoset Marrëveshja për themelimit e Pikave të Përbashkëta të Kalimit Kufitar mes Kosovës dhe Maqedonisë së Veriut. Lajmin e ka bërë të ditur Ministria e Punëve të Brendshme e Kosovës pas takimit që ministri Xhelal Sveçla zhvilloi me Ambasadoren e Maqedonisë së Veriut në Prishtnë, Shpresa Jusufi, ku iu dorëzua dhe Marrëveshja e nënshkruar nga Ministri i Maqedonisë së Veriut, Oliver Spasovski, “Marrëveshja për themelimin e Pikave të Përbashkëta të Kalimit Kufitar mes Republikës së Kosovës dhe Republikës së Maqedonisë së Veriut”.

Kjo Marrëveshje e nënshkruar sot edhe nga Ministri Sveçla, thekson njoftimi, është hartuar mbi marrëdhëniet fqinjësore mes dy vendeve dhe ka për qëllim fuqizimin e mëtejmë të bashkëpunimit rajonal.

“Marrëveshja do të mundësojë themelimin e pikave të përbashkëta të kalimit kufitar me Republikën e Maqedonisë së Veriut, “Han i Elezit – Bllacë” dhe “Glloboqicë-Jazhincë”. Në pikën e përbashkët të kalimit kufitar “Han i Elezit – Bllacë”, kontrollet doganore dhe kufitare do të kryhen në territorin e Republikës së Maqedonisë së Veriut (PPKK Bllacë) ndërsa në pikën e përbashkët të kalimit kufitar “Glloboqicë – Jazhincë” kontrollet doganore dhe ato kufitare do të bëhen në territorin e Republikës së Kosovës (PPKK Glloboqicë),” thekson njoftim duke saktësuar se qytetarët e dy shteteve përmes kësaj marrëveshje nuk do t’i nënshtrohen më ndalesave të dyfishta por kontrollet do të bëhen vetëm në njërën pikë të kalimit ndërsa përfundon

“Ky thjeshtim i procedurave do të krijojë lehtësira të lëvizjes së personave dhe automjeteve. Do të kursejë kohën e qytetarëve dhe do të shmangë pritjet në pikat kufitare.”, përfundon njoftimi.