Marrëveshja me USAID 34.5 mln $, Osmani: Sa herë punojmë bashkë me SHBA, shteti ynë përfiton!

Marrëveshja për objektivat zhvillimore me USAID-in, në vlerë prej 34,5 milionë dollarësh është edhe një rinkonfirmim i vizionit të përbashkët për një të ardhme më të mirë dhe më të qëndrueshme për të gjithë qytetarët e Kosovës pa dallim, tha Presidentja e Kosovës, Vjosa Osmani, pas firmosjes së marrëveshjes me Mary Elieen Devitt, në emër të USAID-it.

“Secila nismë dhe secili sukses që në qendër ka përmirësimin e jetës së qytetarëve të Kosovës dhe forcimin e institucioneve tona demokratike e llogaridhënëse, ka po ashtu gjurmët e SHBA-së. E sot nuk është aspak ndryshe,“ tha Vjosa Osmani pas firmosjes së Marrëveshjes në dalje publike me Ambasadorin amerikan, Jeffrey Hovenier.

Sipas Presidentes së Kosovës, amandamenti i marrëveshjes për grantin për objektivat zhvillimore, në një vlerë shtesë prej 34.5 milionë dollarë, i cili në total të marrëveshjes arrin 142.6 milionë dollarë, do të mbështesë projektet që synojnë shërbime më të mira për qytetarët nga institucione llogaridhënëse dhe efektive të qeverisjes si dhe rritje të mundësive për pjesëmarrje gjithëpërfshirëse demokratike dhe ekonomike.

“Në këtë mënyrë ne nuk po ndërtojmë vetëm institucione më të forta e më të qëndrueshme, por edhe një shoqëri më të drejtë e më të barabartë për të gjithë. SHBA kanë qenë dhe mbeten një partner i përkushtuar dhe i palëkundur i popullit të Kosovës. Krahas mbështetjes financiare populli amerikan ndër vite ka treguar një partneritet të vazhdueshëm të ndërtuar mbi vlera, por mbi të gjitha një partneritet të ndërtuar në besim të ndërsjellë. Besim në një Kosovë, që në çdo vendim të saj ka popullin e saj.”

Duke falënderuar Ambasadorin Hovenier dhe përfaqësuesen e USAID-it, Mary Elieen Devitt, në emër të qytetarëve të Kosovës, Presidentja e Kosovës, Vjosa Osmani, shprehu mirënjohjen e thellë për këtë angazhim të pandërprerë të institucioneve dhe popullit amerikan ndërsa përfundoi:

“Le ta vazhdojmë këtë rrugëtim së bashku, duke forcuar edhe më tej lidhjet tona dhe bashkëpunimin tonë, e duke krijuar mundësi më të mëdha për zhvillimin e Kosovës. Këto nisma të përbashkëta janë deklarimi i fuqisë së bashkëpunimit tonë dhe një garanci për një të ardhme të ndritur për vendin tonë. Sa herë punojmë bashkë me SHBA-të qytetarët tanë dhe shteti përfiton.”

Ambasadori amerikan në Kosovë, Jeffrey Hovenier, edhe pas nënshkrimit të kësaj marrëveshje me USAID-in foli për dallimet që SHBA dhe partnerët tjerë ndërkombëtar i kanë me Qeverinë e Kosovës.

“Shumë prej jush keni parë raportet në media për dallimet e tashme ndërmjet SHBA-së dhe anëtarëve tjerë të bashkësisë ndërkombëtare me qeverinë e Kosovës për disa veprime që janë të udhëhequra nga qeveria e kryeministrit Kurti. Po përballemi me disa sfida me qeverinë e Kosovës, të cilat kanë ndikuar në cilësinë e partneritetit tonë,” tha Hovenier dukes shtuar se ndonëse në disa fusha të bashkëpunimit me qeverinë e tanishme të Kosovës mbesin më pak pozitive se sa do të kishin dëshiruar, përkushtimi i SHBA-së ndaj popullit të Kosovës mbetet po aq i fortë e i hekurt si gjithmonë.

“Ngjarja e sotme dhe përmbyllja e një marrëveshje për të ofruar 34.5 milionë dollarë në fonde shtesë për asistencë për zhvillim për popullin e Kosovës, për rritjen ekonomike, qeverisjen e mirë, integrimet në Evropë etj, besoj se qartazi e thekson këtë gjë.”

Ambasadori amerikan tha se gjatë 25 vjetëve që kur SHBA filloi të ofrojë mbështetje për Kosovën, deri tani ka dhënë mbi 1 miliardë dollarë për popullin e Kosovës.

“Përgjatë këtyre viteve kjo ndihmë e qeverisë dhe popullit amerikanë ka ndihmuar në mbështetjen e themelimit të institucioneve lokale e qendrore, ju ka ndihmuar bizneseve të Kosovës, ka forcuar mediat e pavarura, ka përmirësuar sigurinë e shumë gjëra të tjera. Këto fonde të reja ngjashëm do të orientohen nga veprimtaritë e programet do të përforcojnë edhe më shumë ekonominë e Kosovës, do të mbështesin qeverisjen e mirë dhe shërbimet qeveritare më efektive për të gjithë qytetarët e Kosovës,” tha Ambasadori amerikan në Kosovë, Jeffrey Hovenier, duke përfunduar:

“Ne mendojmë se këto fonde do t’i ndihmojnë Kosovës për t’u integruar më mirë edhe në tregjet evropiane si dhe të afrohet edhe më shumë me institucionet euroatlantike siç është anëtarësimi në BE, e që është qëllim i përbashkët.”