Marrëveshja PD-LSI, Rama: Duan të lidhin Lulin me zinxhirin e Monikës për llogari të Saliut dhe Ilirit!

Sërish edhe këtë javë shfokusoi ekonominë, dhe daljen e tij Kryeministri Edi Rama e përdori për të sulmuar Marrëveshjen PD-LSI, liderin e opozitës Lulzim Basha, normalisht Presidentin e Republikës, Ilir Meta, e meqë nuk ka se çfarë ti thotë elektoratit detyrimisht duhet sulmuar Sali Berisha!

Për marrëveshjen e firmosur dje mes PD dhe LSI, analisti i Nikollës, fjalimshkronjësi i Likes dhe autori i Kurbanit, Edi Rama tha se plani është shumë i qartë:

“Duan të lidhin Lulin me zinxhirin e Monikës për llogari të Saliut dhe të Ilirit dhe pastaj sigurisht ose për të marrë pushtetin dhe për të shpërbërë reformën në drejtësi ose për të marrë kokën e Lulit,” tha Edi Rama ndërsa ka falënderuar Ilir Metën sepse thjeshtëzoi ekuacionin për referendumin, duke thënë se më 25 prill shqiptarët duhet të zgjedhin me drejtësinë apo me Ilir Metën.

Punë shkijesh, për ata që nuk e harrojnë Marrëveshjen Meta-Rama të vitit 2013, për ata që e kanë harruar, ja se çfarë thotë Edi Rama kur Ilir Meta nuk bënë marrëveshje me te:

“Në një farë mënyre Ilir Meta duhet falënderuar sepse ka sqaruar plotësisht ekuacionin e referendumit, i cili ishte një ekuacion i paplotë me vetëm njërën anë, që në 25 prill referendumin popullor do të shpërbëjë reformën në drejtësi. Tani Ilir Meta i fton shqiptarët në një referendum ku duhet të zgjedhin me drejtësinë apo me Ilir Metën. Me reformën në drejtësi deri në fund apo me Ilir Metën? Zgjedhje më të qartë, më të drejtpërdrejt shqiptarët nuk mund të kenë më 25 prill dhe për këtë Ilir Meta duhet falënderuar. Sa i përket opozitës, është shumë e qartë për ata që shikojnë përtej asaj që duket, mjafton të shikojnë firmosjen e marrëveshjes së djeshme për të kuptuar planin. Plani është shumë i qartë, pse u firmos marrëveshja dje? Si mund të firmosin një marrëveshje paraelektorale dy parti që garojnë veç e veç? Pse, për çfarë? Është shumë e thjeshtë, është pjesë e planit për të lidhur Lulin me zinxhirin e Monikës për llogari të Saliut dhe të Ilirit dhe pastaj sigurisht ose për të marrë pushtetin dhe për të shpërbërë reformën në drejtësi ose për të marrë kokën e Lulit. Ka më thjesht se kaq. Është shumë e qartë pse e duan Lulin të lidhur para zgjedhjeve, por këtu problemi nuk është Ilir Meta, në fakt në këtë pjesën e dytë, këtu problemi është Lulzim Basha që nuk ka këllqe, s’ka karakterin e një lideri që të mos fshihet as kur i tregojnë se çfarë do t’i bëjnë të nesërmen dhe as kur aleati i tij i madh thotë ‘unë amerikanët i kap për veshësh’. Është e qartë, por nuk mund t’ia kërkojmë sepse nuk është lideri, është thjesht menaxheri i një shoqërie aksionere me dy ortakë, me Ilir Metën, me Sali Berishën dhe me një noterë dhe përmbaruese, Monikën. Besoj jam i qartë,” tha Edi Rama duke besuar por edhe sot duke heshtur për 20 persona që janë përfshirë në vjedhjen e votës, për të cilët flet për dy ditë, askush nuk e di se janë dënuar dhe kur pyetet, patjetër që acarohet me gazetarët. Me kë tjetër, ata që u përgjuan dhe kanë blerë votën i ka në strukturat më të larta të partisë, njërin madje edhe kryetar të Bashkisë Lezhë.

Por gazetarja i bëri pyetjen si për Dosjen 184 ashtu dhe faktin se sa i besueshëm mund të jetë Edi Rama për fenomenin e shit-blerjes së votës, pasi, nëse nuk janë të vërteta pse është tërhequr nga padia e gazetarit të Bild që publikoi përgjimet:

“Jam realisht shumë i interesuar që të kuptoj se kur i bëni këto pyetje, se i mendoni vërtetë apo i recitoni se ua thonë pronarët. Se di nëse nuk kam për ta marrë vesh tamam. Është e pabesueshme që ju të bëni këtu prokurorin dhe gjykatësin suprem. Ju keni emra dhe ju keni pretendimin se nuk janë hetuar. Ku e dini ju?! Nga e dini ju? Si e dini ju? Psh, apo ku e dini ju që emrat që ju përmendni janë të përfshirë në diçka që është kriminale?! Si e dini ju? Nga muhabetet e telefonave?! Si mund të bëhet kjo prokurori dhe gjykatë në media me kufje në vesh?! Është habi e madhe. Ndërkohë që është prokuroria ajo që bën hetimin, prokuroria e shtetit dhe jo e news-eve. Është ajo që vendos për kë ngre akuzë dhe për kë jo. Jo juve. Ju kam thënë dhe një gjë gjithmonë, bëni sondazhe, mos i komentoni ato të të tjerëve. Nuk ka shans që të përmbyset rezultati i një procesi elektoral kombëtar duke blerë. Nuk ka shans! As fabrika parave të LSI nuk arrin që të përmbys rezultatin kombëtar. Është fabrikë që ka punuar me eficense të plotë në raste të caktuar. S’ka shanse! Dhe përsa i përket besueshmërisë time, unë nuk mund të jem i besueshme për burime të infektuara informimi. Skam se si të jem i besueshëm. Se sa i besueshëm, këtë e vendos populli shqiptar. Populli shqiptar në datë 25 do të na japë testin e besueshmërie në dorë të gjithëve. S’ka problem. Nuk pres që të behëm i besueshëm për pronarët e disave prej jush. Nuk bëhem i besueshëm për ta se do të bëhem i pabesueshëm për popullin shqiptar.”

E për ti injektuar miletit idenë e modelit të liderit të fortë, edhe sot Kryeministri Edi Rama sikur i dha përgjigje ndërkombëtarëve që kërkojnë vendosjen në lista të kandidatë për deputetë me integritet.

“Unë kam përshtypjen që kujtesa më funksionon saktë kur them që komunizmi ka vdekur në vitin 1990 në Shqipëri, po ashtu dhe ‘gjuetia e shtrigave’ ka përfunduar në vitin 1990 si filozofi shteti, pushteti, shoqërie. Këto pyetje më duke pa vend, pa kuptim, pa lidhje, sepse realisht ajo që është për të ardhur keq, që ndërkohë që në Kuvendin e Shqipërisë unë kam parë e shoh gra shumë të zonjat me të gjitha atributet për të qenë lartësisht të respektuara, krejt në rregull nga çdo pikëpamje që lidhjet me këtë temë, kjo temë është bërë një këngë e padurueshme, duke kriminalizuar komplet një grup të tërë njerëzish. Kemi pasur probleme me disa individë, probleme që janë adresuar, kemi ligj për adresimin e këtij fenomeni, është shumë e qartë që interesi ynë është që t’u japim mundësi shqiptarëve të zgjedhin kandidatët më të mirë të mundshëm.
Është bërë shumë bajate dhe banale gjithë kjo histori. E kuptoj që miqtë dhe partnerët tanë ta thonë, ta kërkojnë në funksion të mbështetjes së një procesi që vazhdon, por procesi është i garantuar dhe ne nuk duhet të bëhemi pre e gjithë kësaj baltëlline ku zhysim përditë njëri-tjetrin sepse kanë kaluar në plan të dytë, të tretë njerëzit që bëjnë ligjet në Kuvendin e Shqipërisë. Janë njerëz të nderuar dhe respektuar që punojnë realisht,” tha Kryeministri Edi Rama duke përfunduar:

“Kush e bëri Reformën në Drejtësi, kriminelët? Kush? Kush i ka bërë të gjitha reformat, kush i ka kaluar në parlament? Kriminelët? Është realisht e tepërt, nuk kam fjalë për këtë. Është absolutisht e tepërt.”

E kur është fjala për Reformën në Drejtësi, Kryeministri Edi Rama është i bindur se ka nisur të japë efekte. Për ta sqaruar sërish i duhet Presidenti i Republikës, ndërsa shton se Reforma në Drejtësi është aq e besueshme saç është niveli i shkallimit të Ilir Metës.

“Ne s’do të bënim gabimin që bën Ilir Meta dhe ata të cilët kanë lidhur Lulin me zinxhirë, pasi reforma në drejtësi, dhe jo çdo ligj por çdo nen nuk është vullnet thjesht dhe vetëm i shumicës por vullnet i plotë i garantëve të reformën në drejtësi që janë miqtë dhe partnerët tanë amerikanë dhe evropianë. Nuk ka nen të reformës që kalon pa u diskutuar dhe u miratuar paraprakisht dhe bashkërisht. Këtu kam parasysh se një nga të dyja palët, amerikanët dhe evropianët, thotë ‘jo’ nuk kalon. Mos u shqetësoni fare. Reforma në drejtësi është aq e besueshme saç është niveli i shkallimit të Ilir metës. Po mos të ishte e besueshme Ilir Meta do të ishte i qetë dhe i dashur. Shikoni Ilir Metën dhe aty matet qetësia e tij. Shikoni Metën dhe do të shih i se reforma ka nisur të shfaqe disa shenja që nuk janë shumë, por janë majftueshmërisht të qarta për të tensionuar Ilir Metën dhe Sali Berishën. Shumë e qartë kjo. Paketa është e harmonizuar me partnerët. Patjetër që nuk diskutohet se me një opozitë tjetër, nëse Luli nuk do të këpusë zinxhirin, do të jetë e vështirë reforma në drejtësi.”