Marrëveshja PD-PDIU, Basha: T’i japim fund bashkëqeverisjes së Edi Ramës me krimin
Partia Demokratike dhe Opozita e Bashkuar kanë sot një mision jetik për çdo familje shqiptare. T’i japim fund bashkëqeverisjes me krimin, të largojmë një orë e më parë aleancën e pushtetit me krimin që ka zaptuar Qeverinë, Parlamentin, institucionet e drejtësisë, Policinë, të çlirojmë vendin nga sundimi i bandave. Kështu u shprehë kryetari i Partisë Demokratike, Lulzim Basha, pas konkludimit me sukses të bisedimeve me Partinë Drejtësi Integrim dhe Unitet për të shërbyer në interesin e qytetarëve në këtë moment kritik për Shqipërinë dhe shqiptarët, ndërsa i uroi mirëseardhje PDIU-së dhe liderit të saj, Shpëtim Idrizi në Frontin e Opozitës së Bashkuar.
“Bashkëpunimi ynë do të shtrihet në të gjitha fushat me atë më emergjenten të shkëputjes së lidhjeve të krimit me politikën, të organizimit të zgjedhjeve të lira dhe të ndershme dhe të ofrimit të një zgjidhje politike, të çlirimit të drejtësisë nga kapja politike dhe të çlirimit të ekonomisë nga oligarkia dhe monopolet për t’u rikthyer shqiptarëve jo vetëm e thjeshtë paratë e vjedhura nga bashkëpunimi midis oligarkëve të korruptuar dhe qeveritarëve, por edhe shpresën dhe mundësinë e zhvillimit ekonomik dhe punësimit të të rinjve dhe gjithë qytetarëve shqiptarë.”
Ndërsa kryetari i Partisë për Drejtësi Integrim dhe Unitet, Shpëtim Idrizi tha se
ka ardhur koha që kjo opozitë të ketë alternativën e saj që ne përfundimisht të ndahemi nga ky tranzicion i tejzgjatur, të vendosim shtetin ligjor dhe ti japim shpresë shqiptarëve.
“Partia për Drejtësi Integrim dhe Unitet deri më sot ka qënë në opozitë, sot është pjesë e Opozitës së Bashkuar, sepse përballë një maxhorance arrogante, një ekonomie pa busull që nuk orientohet nga prodhimi, përballë një krimi në realitet në rritje, trafiqeve dhe ajo që është më e rënda, braktisjes së këtij vendi nga shqiptarët, ne kemi nevojë që të kemi një opozitë të fortë.”
Besoj që një ndër gjërat që ne kemi ndarë edhe si prioritet i Partisë për Drejtësi Integrim dhe Unitet është trajtimi i çështjes së shqiptarëve të Çamërisë në përputhje me të gjithë konventat ndërkombëtare, veçanërisht me konventën ndërkombëtare të të drejtave të Njeriut, rezolutën shqiptare të Çamërisë, çështje për të cilën Basha u shprehë:
“Partia Demokratike e Shqipërisë ka qënë, është dhe mbetet thellësisht e angazhuar për të drejtat e shqiptarëve të Çamërisë në dimensionin historik të kujtesës dhe respektit, nderimit për viktimat, në dimensionin e sigurimit të lëvizjes së lirë për qytetarët shqiptarë të lindur në Çamëri dhe në dimensionin e përpjekjeve juridike dhe diplomatike për të garantuar të drejtën e pronës për të gjithë qytetarët shqiptarë të Çamërisë.”
Gjatë takimit me Lulzim Basha, jashtë retorikës boshe dhe jashtë folklorizmit, Shpëtim Idrizi thekson se kjo jo vetëm që nuk e ka ndihmuar Çështjen Çame:
“Përkundrazi e ka bërë që Çështja Çame të jetë e përdorur deri më sot, që ne të angazhohemi të dy si parti politike, por edhe në kuadër të opozitës së bashkuar për t’i dhënë zgjidhje të drejtë dhe racionale të shpejtë çështjes së shqiptarëve të Çamërisë në dimesnionin siç e tha z Basha, në dimensionin historik të nderimit të viktimave të një genocidi të tmerrshëm të bërë karshi shqiptarëve, por edhe eksplorimin e të gjitha rrugëve diplomatike dhe juridike për zgjidhjet pronësore për shqiptarët e Çamërisë.”
Në fund, Partia Demokratike dhe Partia për Drejtësi, Integrim dhe Unitet, firmosin Memorandumin për, siç u tha, koordinimin e aktivitetit politik me qëllim realizimin e programit të përbashkët.
