Marrëveshja për emigrantët, shefi i diplomacisë italiane sot në Shëngjin

Kryeministri Edi Rama u mundua ta qetësoj opinionin i cili reagoi ashpër për Marrëveshjen e strehimit të emigrantëve afrikanë në Shëngjin me Kryeministren e Italisë, Giorgia Meloni, duke i servirur një vendim të Gjykatës Kushtetuese që pezullon ratifikimin e kësaj marrëveshje, por inspektimi i vendstrehimit të emigrantëve sot nga ministri i Jashtëm italian, Antonio Tajani, konfirmon atë që ministri i Ramës e tha qartë se “ajo u pezullua por do të miratohet nga Gjykata Kushtetuese”.

Kështu, sot Antonio Tajani do të takoj në Tiranë, Kryeministrin Edi Rama dhe do të vizitoj Shëngjinin aty ku Rama ka vendosur të zbarkoj emigrantët afrikanë, siç i ka premtuar Melonit, dhe do ti vendos në Gjadër ku do të ndërtohet kampi, siç e parashikon Marrëveshja.

Ndryshe, më 13 dhjetor Gjykata Kushtetuese mori në shqyrtim kërkesën e 30 deputetëve të grupit Bardhi-Berisha kundër marrëveshjes me Italinë për emigrantët afrikanë, dhe e pezulloi Marrëveshjen Rama-Meloni deri në vendimin përfundimtar të gjykatës.

Më 18 janar 2024 pritet të mbahet seanca e parë ku palët pritet të paraqesin pretendimet e tyre dhe brenda 3 muajve Gjykata Kushtetuese duhet të marrë një vendim mbi marrëveshjen.

Ndonëse Kryeministrja italiane Giorgia Meloni tha se e respektonte vendimin e gjykatës dhe se do të priste deri në një vendim përfundimtar, shqiptarët tashmë duke e ditur se ende nuk kemi një vendim të Gjykat Kushtetuese dhe as ratifikim të Marrëveshjes nga parlamenti, e kanë të qartë se kjo marrëveshje do ketë fatin e traut në Rrugën e Kombit, rrënimin e shtëpive në Unazën e Re, shembjen e Teatrit Kombëtar, PPP-ve kriminale në Shëndetësi, inceneratorit, Portit të Durrësit, Thuman-Kashar dhe çdo projekti tjetër anarkie që mbanë firmën e Edvin Kristaq Ramës.