Marrëveshja për Reformën Zgjedhore, sot takimi i parë i Këshillit Politik
Produkti i parë i Marrëveshjes për Reformën Zgjedhore, Këshilli Politik,sot zhvillon dhe takimin e parë në orën 17:00 ku pritet të autorizohet Platformën e Punës së procesit të Reformës Zgjedhore . Ndërkohë mazhoranca dhe opozita e bashkuar kanë përcaktuar dhe përfaqësuesit në këtë organizëm për zbatimin e kësaj Reforme.
Kështu nga Opozita e Bashkuar, PD do të përfaqësohet nga Oerd Bylykbashi, ndërsa LSI nga Petrit Vasili. Po ashtu mësohet se pjesë e këtij këshilli do të jetë edhe Mesila Doda nga PDIU dhe Fatmir Mediu nga Partia Republikane dhe kreu i PBDNJ-së, Vangjel Dule.
Ndërsa mazhoranca ka vendosur të përfaqësohet nga dy bashkëkryetarët e Komisionit të Posaçëm parlamentar të Reformës Zgjedhore, Damian Gjiknuri dhe Rudina Hajdari, PS do të përfaqësohet nga Ervin Bushati, dhe “Opozita e Edi Ramës” nga Myslim Murrizi e Nimet Musai.
Ndryshe, organizimi i takimit të parë të Këshillit Politik sot është shpresdhënës duke pasur parasysh se është njëri nga dy konkluzionet që u miratuan vetëm dy ditë më parë në Tryezë ku thuhet se brenda muajit janar 2020 Këshilli Politik mblidhet dhe autorizon platformën e punës së procesit të Reformës Zgjedhore.
Ndryshe, sipas Marrëveshjes së arritur në mes të mazhorancës dhe opozitës së bashkuar, Reforma Zgjedhore duhet të përmbyllet deri më 15 mars 2020.
Konkluzionet e Tryzesës
1. Formohet Këshilli Politik me përfaqësues të opozitës, drejtuesve të komisionit të Reformës Zgjedhore dhe përfaqësuesve të grupeve parlamentare në Kuvend.
2. Këshilli mblidhet brenda muajit janar 2020 dhe autorizon platformën e punës së procesit të Reformës Zgjedhore, si më poshtë:
– Një përfaqësi politike (2 persona) nga opozita jashtëparlamentare dhe ekspertë të saj do të punojnë me dy bashkëkryetarët e Komisionit të Reformës Zgjedhore dhe ekspertët e atashuar pranë tij.
– Çështjet që do adresohen përcaktohen në vendimin e Kuvendit Nr.102/2017, i amenduar, “Për ngritjen e komisionit të Reformës Zgjedhore” përfshirë dhe planin e punës të miratuar me konsensus nga Komisioni në vitin 2017, si dhe çdo problematikë tjetër zgjedhore, që palët bien dakord me konsensus, me qëllim arritjen e standardeve ndërkombëtare.
-Palët e përfshira të angazhohen të adresojnë me konsensus të gjitha çështjet e administrimit të zgjedhjeve objekt i punës së Komisioni të Reformës Zgjedhore, përfshirë rekomandimet e OSBE/ODIHR dhe për çështjet të cilat nuk gjendet dakordësi do të kërkohet mendim dhe asistencë nga ekspertiza ndërkombëtare e OSBE/ODIHR me qëllim gjetjen e një zgjidhje të pranueshme.
-Për të ndihmuar në këtë proces Komisioni i Reformës Zgjedhore do të kërkojë zyrtarisht asistencën e OSBE/ODIHR, përfshirë dërgimin e ekspertëve nëse kjo është e mundur, që do të bashkëpunojë me përfaqësuesit politikë dhe ekspertët e përcaktuar në paragrafin e parë të kësaj pike, me qëllim për të lehtësuar procesin procesin e disktimit dhe hartimit të projekt- propozimeve përkatëse.
-Projekti përfundimtar i dakordësuar mes palëve sipas këtij dokumenti, do të miratohet nga Kuvendi në përputhje me procedurat parlamentare. Shumica angazhohet që të mos kryejë ndryshime në Komisionin e Reformës Zgjedhore dhe në seancë plenare në tekstin e miratuar dhe dakordësuar mes palëve sipas këtij dokumenti .
-Palët angazhohen që Reforma të përfundojë jo më vonë se 15 mars 2020.
