Marrëveshja për shpim në Dumre, Rama: Ka një rezervë të konsiderueshme të naftës!

Pas zbulimit të kompanisë SHELL në zonën e Shpiragut sot Kryeministri Edi Rama e ka quajtur një moment shumë të rëndësishëm për të ardhmen e ekonomisë së vendit nënshkrimin e Marrëveshjes me Kompaninë italiane ENI për të bërë shpime dhe eksplorime në bllokun e Dumresë, ku tha ai ka një rezervë të pritshme të konsiderueshme.

“U deshën 30 vjet që ne sot të kemi një kontratë me ENI që nga pikëpamja e vlerës së vet ekonomike për shtetin shqiptar e qytetarët është më e mira dhe më e favorshme që është nënshkruar, janë treguar miqtë italianë shumë të hapur e konstruktive ndaj kërkesës sonë për të pasur një kontratë që të ketë një përfitim të drejtpërdrejt më të madh se sa të mëparshmet për shtetin e një përfitim të mirëstrukturuar në aspektet kohore.”

E përtej kësaj, sqaroi Kryeministri:

“Për të pasur edhe një partner që jo thjesht do eksplorojë e zbulojë naftë në Shqipëri por do ndihmojë në rritjen e cilësisë së burimeve tona njerëzore, do përfshihet në kuadrin e paktit të universitetit me Gjeologji Minierat për të ndihmuar në rritjen e kapaciteteve për të hapur mundësi për trajnime e mastera.”

Objektivi, tha Edi Rama, ishte ta mbyllnim këtë kontratë brenda vitit e të vijohej me eksplorimet.

“Në Dumre ka një rezervë të pritshme të konsiderueshme sikurse zbulimi në Shpirag është një nxitje më shumë për të vijuar me eksplorimet. Bëhet fjalë për një tjetër investim të huaj në Shqipëri, e cila vendos një flamur me shumë peshë në hartën e investimeve të huaja në Shqipëri e përtej vlerës monetare do sjellë edhe vlerën e madhe të dijes e të bashkëpunimit që do rrisë cilësisht gjithë hapësirën që mbulon ky sektor”.

Duke pranuar se raporti ynë me naftën është i komplikuar edhe për shkaqe politike, Kryeministri Edi Rama kujtoi vitet e pushtimit italian kur Viktor Emanueli u prezantua me idenë e pushtimit të Shqipërisë në 1939, dhe ngriti pikëpyetjen se çfarë dreqin i duhen Mbretërisë italiane ato kilometra shkëmbor të Shqipërisë dhe Konti Ciano sqaroi:

“Ata shkëmbinj mund të plotësonin 100% të nevojës italiane për krom, 30% të nevojës për naftë dhe hekur!”