Marrëveshja për targat, Presidentja e Kosovës: Falënderoj SHBA-në!
Pas arritjes së marrëveshjes Kosovë-Serbi për targat ilegale serbe, Presidentja Vjosa Osmani ka falënderuar Shtetet e Bashkuara dhe ambasadorin amerikan në Prishtinë, Jeff Hovenier.
“Falënderoj Jeff Hovenier dhe Qeverinë e SHBA për angazhimin e tyre aktiv në arritjen e marrëveshjes së sotme në Bruksel,” shprehet Vjosa Osmani përmes rrjetit social Twitter duke përfunduar.
“Mbështetja e tyre për procesin e dialogut mes Kosovës dhe Serbisë është e domosdoshme. Kosova u është mirënjohëse”.
Ndryshe, duke bërë të ditur arritjen e marrëveshjes, Përfaqësuesi i Lartë për Politikë të Jashtme dhe Siguri pranë BE, Josep Borrell, tha se marrëveshja parashikon që Kosova t’i japë fund veprimeve të mëtejme të lidhura me riregjistrim të makinave, derisa Serbia nuk do të lëshojë më targa të makinave me emra të qyteteve të Kosovës.
