Marrëveshja Rusi-Serbi, Beogradi përgjigje BE-së: Serbia miqtë i zgjedhë, armiqtë i lajmërohen vet!
Firmosjen në New York nga Serbia të Planit të bashkëpunimit me Rusinë, Raportuesi për Serbinë pranë Parlamentit Evropian, Vladimir Bilçik, e quajti goditje të rëndë për procesin e anëtarësimit të Ballkanit Perëndimor në Bashkimin Evropian si dhe sulm të Rusisë në procesin e zgjerimit të BE; Por nuk vonoi shumë dhe shteti serb, përmes ministrit të Brendshëm, Aleksandar Vulin, i ktheu një përgjigje të ashpër Bashkimit Evropian duke i bërë të qartë se mik kanë Rusinë dhe jo BE-në.
“Serbia është kandidat për anëtarësim në Bashkimin Evropian, integritetin territorial të Serbisë e sulmojnë 22 vende anëtare të Bashkimit Evropian, duke pranuar shtetin e rremë të Kosovës. Të kuptohemi, kjo është goditje e madhe në rrugën evropiane të Serbisë,” tha Vulin duke përbuzur deklaratën e Raportuesit të PE, dhe duke i dhënë në fund goditje edhe gjithë familjes evropiane e cila nga viti 1999 i mbylli sytë para krimeve serbe në emër të evropianizimit të shtetit kriminal serb:
“Në veçanti, të jetë e qartë, Serbia i zgjedhë miqtë, armiqtë i lajmërohen vetë,” tha ministri i Brendshëm, Aleksandar Vulin.
Ndërkohë Raportuesja për Kosovën në Parlamentin Evropian, Viola von Cramon, e ka quajtur skandal të rëndë nënshkrimin e Marrëveshjes mes Serbisë dhe Rusisë ndërsa e cilësoi si sinjal për ngrirjen e bisedimeve për anëtarësimin e Serbisë në BE.
“Ky është një skandal i rëndë. Në mes të luftës së furishme, Ministria e Jashtme e Serbisë nënshkruan Planin e bashkëpunimit të ardhshëm me agresorin rus. Apo ndoshta është vetëm një sinjal për ne që të ngrijmë bisedimet e anëtarësimit pasi hyrja në BE nuk kalon përmes Moskës,” thekson në reagimin e saj përmes rrjeti social Twiter, Raportuesja për Kosovën në PE, Viola von Cramon.
Pas situatës së krijuar, në orët e pasditës, Presidenti i Serbisë, Aleksandar Vuçiç, bëri të ditur se do ti drejtohet kombit brenda 72 orëve.
