Marrëveshje me DPA: Dokumentet arkivore, falas për studentët e historisë
Drejtoria e Përgjithshme e Arkivave, DPA, nënshkroi sot një marrëveshje bashkëpunimi me Fakultetin e Historisë dhe të Filologjisë, përmes së cilës synohet lehtësimi i studimeve të studentëve në fushën e shkencave albanologjike, si një interes institucional dhe kombëtar.
Pas nënshkrimit të Marrëveshjes, Drejtori i Përgjithshëm i Arkivave Dr. Ardit Bido tha se kjo marrëveshje u mundëson të gjithë studentëve në nivel bachelor dhe master që të mund të marrin dokumente falas, një mënyrë kjo për të nxitur studime në fushën albanologjike dhe në fushën historike.
“Studentët për të bërë një temë bachelor dhe master, tashmë përmes kësaj marrëveshjeje, me një autorizim nga departamenti, duke përcaktuar pedagogun përkatës udhëheqës, do të mundet që për një sasi të caktuar që do të konsiderohet rast pas rasti për çdo temë, të marrin dokumentacionin falas në Arkivin Qendror Shtetëror,” tha Dr. Ardit Bido ndërsa Dekani i Fakultetit , Prof. Dr. Sabri Laçi, duke falenderuar Drejtorin e Përgjithshëm të Arkivave ndërsa e konsideron Arkivin Qendror Shtetëror si partnerin më të rëndësishëm të Fakultetit të Historisë dhe Filologjisë, vlerëson se kjo marrëveshje është në rrugën e duhur.
“Departamenti i Historisë në Fakultetin e Historisë dhe Filologjisë ka qënë në lartësinë e duhur për sa i përket punës kërkimore shkencore dhe mbështetja e arkivit në këtë rast është për tu shënuar. Sigurisht ne kemi dhe partnerë të tjerë dhe jemi në vazhdën e zgjerimit të partnerëve kombëtar dhe ndërkombëtar, sa i përket zgjerimit të hapësirave të punës kërkimore shkencore, për student, për staf, për të gjithë kërkuesit shkencor që dëshirojnë të kontribojnë në studimin dhe rishikimin e historisë së Shqipërisë dhe më gjerë,” tha Prof. Dr. Sabri Laçi.
Ndryshe, me këtë Marrëveshje, Drejtoria e Përgjithshme e Arkivave merr përsipër të mbështesë Fakultetin e Historisë dhe Filologjisë me burimet arkivore në formë digjitale deri në 20 mijë imazhe në vit pa pagesë. Përveç kësaj, DPA dhe FHF angazhohen në organizimin e konferencave, simpoziumeve, tryezave dhe kongreseve shkencore, në fushat e interesit të përbashkët si dhe për promovimin e përbashkët të personaliteteve dhe momenteve kyçe të historisë kombëtare.
Marrëveshja e nënshkruar nga Drejtori i Përgjithshëm i Arkivave Dr. Ardit Bido dhe nga Dekani i Fakultetit të Historisë dhe Filologjisë Prof. Dr. Sabri Laçi, u vlerësua në vazhdën e bashkëpunimit midis dy palëve në fushën e kërkimit shkencor dhe botimeve, nëpërmjet qasjes së lirë në fondet arkivore dhe botimeve të përbashkëta të lidhura me to.
