“Marshojmë për njana – tjetrën”, marshi i 8 Marsit në Prishtinë, kërkohet drejtësi për gratë e vrara

Sot në Ditën Ndërkombëtare të Gruas u mbajtë marshi tradicional i 8 Marsit organizuar nga Kolektivi “Marshojmë s’Festojmë” me moton “Marshojmë për njana – tjetrën”, në të cilin morën pjesë vajza e gra të të gjitha moshave, ku nuk munguan as ato nga jeta publike.

“Drejtësia me vonesë është padrejtësi”, “Sot marshojmë çdo ditë luftojmë”, “Trupi jem e drejta jem” ishin disa prej pankartave që mbanin në duar pjesëmarrëset e këtij marshi ndërsa me thirrjen drejtësi për gratë dhe vajzat si dhe poshtë policia patriarkale janë lexuar emrat e grave tashmë të vrara nga bashkëshortët e tyre tek objekti kryesor i Policisë së Kosovës.

Me këtë rast protestueset e këtij marshi hodhën ngjyrë të kuqe drejt këtij objekti, duke kërkuar drejtësi për gratë e vrara.

Ndryshe, sot në shënimin e Ditës Ndërkombëtare të Gruas, Kolektivi “Marshojmë s’festojmë” nisi marshin tradicional protestues në kryeqytet në mesditë 12:00 nga sheshi “Zahir Pajaziti” për të vazhduar deri tek sheshi “Skënderbeu”.

Sot kudo në botë shënohet 8 Marsi, Dita Ndërkombëtare e Gruas.

Kjo ngjarje zë fill më 8 mars 1857, kur rrobalarëset e New YJorkut u ngritën në protestë për të drejtat e tyre kundër shtypjes e shfrytëzimit të egër që u bëhej atyre dhe fëmijëve në punë.

100 gra nga shumë vende evropiane dhe të Shteteve të Bashkuara të Amerikës, të mbledhura në Kopenhagë të Danimarkës, nën kryesinë e Klara Cetkinit, vendosen që 8 Marsi të shënohet si Dita Ndërkombëtare e Grave.

Për nder të kësaj dite, nënave dhe grave u jepen dhurata të ndryshme, ku dhurata më e shpeshtë është lulja, simbol ky i respektit dhe dashurisë.