Masa e Sigurisë për Kryetarin e PD, Sali Berisha, Gjykata Kushtetuese cakton datën e shqyrtimit

Gjykata Kushtetuese ka caktuar datën 19 nëntor për të shqyrtuar ankimin e Kryetarit të Partisë Demokratike, Sali Berisha, kundër masës së sigurisë.

Kryetari i PD-së, Sali Berisha, në ankimin e drejtuar Gjykatës Kushtetuese kërkon shfuqizimin e vendimit të dhënë nga Shkalla e Parë e Gjykatës së Posaçme, atë të Apelit të GJKKO-së, dhe, Gjykatës së Lartë, që e lanë në fuqi masën.

Më 18 shtator, Gjykata Kushtetuese vendosi të kalojë për shqyrtim në seancën plenare ankimin e bërë nga Kryetari i PD, Sali Berisha, kundër masës së parë të sigurisë të caktuar ndaj tij, “detyrimit paraqitje” dhe “ndalim të daljes jashtë shtetit”.

Sali Berisha pretendon se SPAK ka shkelur ligjin pasi masën “Detyrim paraqitje” duhej t’i drejtohej Kuvendit për miratim, pasi hyn tek masat kufizuese të lirisë., bazuar dhe në precedentët e mëparshëm si është vepruar me deputetët e Parlamentit të Shqipërisë.

Gjykata Kushtetuese do të shqyrtojë ankimin e Sali Berishës pa praninë e palëve, por vetëm mbi bazë dokumentesh.