Masat e AMF, kompanitë e sigurimit po “kapen” më shumë në shkelje
Masat e Autoritetit të Mbikëqyrjes Financiare, AMF, ndaj kompanive të sigurimit janë në rritje gjatë vitit 2021.
Duke iu referuar Buletinit Zyrtar të vendimeve të këtij insitucioni, deri tani gjatë këtij viti janë ndërmarrë pesë masa administrative ndaj shoqërive të sigurimit, nga dy të tilla që ishin marrë gjatë gjithë vitit 2020. Njëkohësisht, Bordi i AMF ka miratuar pesë vendime për eliminim shkeljesh, nga dy të tilla që ishin marrë për vitin 2020.
Vitin e kaluar, edhe aktiviteti i institucioneve rregullatore u ndikua nga pandemia, që solli një vëmendje më të madhe në menaxhimin e efekteve të shkaktuara nga kjo ngjarje dhe kufizoi numrin e inspektimeve. Rritja e masave gjatë këtij viti mund të shpjegohet edhe zbutjen e kufizimeve dhe me kthimin gradual në normalitet të aktivitetit mbikëqyrës.
Në rastin e kompanive të sigurimit, AMF nuk e publikon përmbajtjen e vendimeve të këtij lloji, ndaj llojet e shkeljeve të konstatuara, masat e ndërmarra apo emrat e subjekteve të sanksionuara janë informacione të rezervuara. Në përgjithësi, kjo është një praktikë që ndiqet nga shumica e autoriteteve rregullatore dhe mbikëqyrëse të tregjeve bankare dhe financiare, sipas parimit që publikimi i këtyre masave mund të shkaktojë një dëm në reputacionin dhe biznesin e institucioneve që janë subjekt i vendimeve të këtij lloji.
Megjithatë, e njëjta logjikë së fundmi nuk është ndjekur ndaj kompanive financiare që veprojnë në tregje të tjera të mbikëqyrura nga AMF. Në muajt maj dhe korrik, Bordi i AMF ndërmori masa detyruese dhe urdhra për eliminim shkeljesh ndaj të katër shoqërive administruese të fondeve të pensionit dhe vendimet në fjalë u publikuan. Lidhur me këtë çështje, AMF i referohet ligjit për funksionimin e saj, i cili i njeh të drejtën Bordit të institucionit të vendosë për rastet kur përmbajtja e vendimeve nuk duhet publikuar.
Sipas ligjit “Për veprimtarinë e sigurimit dhe risigurimit”, AMF mund të vendosë ndaj shoqërive të sigurimit gjoba që fillojnë nga një milionë lekë deri në tre milionë lekë. Subjekte të gjobave mund të jenë edhe administratorët e shoqërive të sigurimit, për shuma nga 100 mijë deri në 400 mijë lekë, si edhe anëtarët e këshillit mbikëqyrës, në intervalin mes 300 mijë lekë dhe 500 mijë lekë. Ligji përcakton se, kur vendos sanksion me gjobë, AMF siguron që ajo të jetë e efektshme dhe parandaluese, si edhe në përpjesëtim me gjendjen që e shkaktoi vendosjen e masës. Gjithashtu, ligji kërkon që AMF, gjatë vendosjes së sanksioneve, të zbatojë parimin e vazhdimësisë, sipas të cilit për shkelje të ngjashme vendosen sanksione të ngjashme.
Në Shqipëri ushtrojnë aktivitet tetë shoqëri të licencuara për ofrimin e sigurimeve në klasat e jo-jetës dhe katër shoqëri të tjera për produkte të sigurimit të jetës./Monitor/
