Masat e reja Anticovid në Kosovë, mësimi parauniversitar pezullohet për dy javë
Pas analizës epidemiologjike, Qeveria e Kosovës sot ka vendosur që përkundër përmirësimit të vazhdoi me disa masa që ishin në fuqi, dhe miratoi disa masa shtesë Anticovid për të ruajtur shëndetin publik. Ndër masat e reja është mbyllja e institucioneve parashkollore e qëndrimeve ditore, shtyrja e fillimit të mësimit për dy javë, ndalimi i mësimit me prezencë fizike në universitete ndërsa studentët për t’iu mundësuar regjistrimi në konvikt, duhet të kenë çertifikatë vaksinimi, test PCR apo serologjik.
“Aktiviteti mësimor në institucionet publike dhe private të arsimit parauniversitar, duke përfshirë edhe institucionet e arsimit parashkollor dhe të qëndrimit ditor pezullohet deri më datë 26 shtator 2021. Ky pezullim vlen edhe për aktivitetin mësimor me prezencë fizike në institucionet publike dhe private të arsimit universitar,” thuhet në masat e reja që u diskutuan në mbledhjen e sotme të Qeverisë duke shtuar.
“Për familjet me fëmijë të regjistruar në institucione parashkollore dhe me dy prindër të punësuar (ose qe ka vetëm një prind dhe ai prind është i punësuar), njëri prind lirohet nga obligimi për t’u paraqitur fizikisht në punë gjatë periudhës 13 – 26 shtator 2021.”
Pas mbledhjes së qeverisë Ministri i Shëndetësisë, Arben Vitia, sqaroi.
“Ditët e fundit ishim dëshmitarë të përmirësimit të situatës, me rënie të personave të infektuar. Gjatë kësaj jave është shënuar edhe rënie në numrin e të hospitalizuarve. Përkundër fillimit të stabilizimit të situatës me pandeminë, kemi akoma numër të lartë të vdekjeve nga Sars-COV2. Për disa ditë me radhë pozitiviteti në testime ka qenë nën 10 për qind, që jep shpresë, por situata mbetet e ndjeshme. Jemi në një stad kur ka rënie të numrave, por situata epidemiologjike mbetet e paqëndrueshme. Pavarësisht se janë shtuar kapacitetet spitalore, rreziku për hospitalizomë në numër të lartë nuk ka kaluar ende. Janë bashkuar mbi 1000 punonjës shtesë shëndetësorë. Kjo javë ka qenë me shumë aktivitete e takime në lidhje me masat e reja, që pritet të hyjnë në fuqi nga nesër më 13 shtator,” tha Arben Vitia pasmbledhjes së qeverisë.
Ndërkohë pas këtij vendimi të Qeverisë, Zv/Ministrja e MASHTI-t, Edona Maloku Berdyna, tha se mësimi online është opsion, mirëpo bazuar në humbjet e mëdha që janë shkaktuar, rikthimi në shkolla me prani fizike pas dy javësh do ishte veprimi më i duhur.
“Mësimi online është njëri ndër skenarët që e kemi detajuar në udhëzues. Synimi ynë mbetet që megjithatë, rikthimi të jetë në shkolla dhe i sigurt. Mësimi online është opsion por duam që ky të jetë më tepër përjashtim nga vendimi sesa vendim,” tha Zv/Ministrja e Arsimit, Shkencës, Teknologjisë dhe Inovacionit pasi u bë e ditur se procesi mësimor është vendosur të shtyhet edhe për dy javët e ardhshme.
Ndryshe, pezullimi i institucionit arsimor parauniversitar vlen deri më 26 shtator 2021.
