Masat e reja Anticovid, nga cilat shtete nuk futesh dot në Kosovë

Ministria e Shëndetësisë së Kosovës duke bërë ditur masat e reja për kontrollin, parandalimin dhe luftimin e  pandemisë COVID-19 saktëson se ndalohet hyrja në Republikën e Kosovës personat që vijnë nga India, Brazili dhe Afrika e Jugut ndërsa shtetasit e Kosovës që vijnë nga këto shtete duhet të karantinohen në shtëpitë e tyre për 14 ditë duke u testuar dy herë në javë.

Ndërkohë kjo masë nuk vlen për shtetasit e Kosovës të cilët qëndrojnë transit më pak se 48 orë në Indi, Brazil dhe Afrikë të Jugut.

Njoftimi:

Vendimi i Qeverisë për masa të përgjithshme dhe të veçanta për kontrollin, parandalimin dhe luftimin e  pandemisë COVID-19.

Në Vendimin Nr. 01/07, të datës 18.04.2021, shtohen pikat si në vijim:

– 3A. Ndalohet hyrja në Republikën e Kosovës për personat që vijnë nga India, Brazili dhe Afrika e Jugut.

– 3A.1 Shtetasit e Republikës së Kosovës të cilët vijnë nga India, Brazili dhe Afrika e Jugut duhet të karantinohen në shtëpitë (vendin e banimit) e tyre për katërmbëdhjetë (14) ditë duke u testuar dy herë në javë.

– 3A.2 Pika 3A.1 nuk vlen për shtetasit e Republikës së Kosovës të cilët qëndrojnë transit (më pak se 48 orë) në shtetet e përcaktuara në pikën 3A.1 të këtij vendimi.

– 3A.3 Diplomatët e huaj si dhe familjarët e tyre përjashtohen nga fushëveprimi i pikës 3A të këtij vendimi.

– Udhëzohen Ministria e  Mjedisit, Planifikimit Hapësinor dhe Infrastrukturës si dhe Ministria e Punëve të Brendshme të marrin vendimet dhe veprimet e nevojshme në përputhje me fushat e përgjegjësisë administrative të tyre me qëllim të zbatimit të këtij Vendimi.

Plotësimi dhe ndryshimi është bërë duke marrë parasysh situatën aktuale epidemiologjike në botë, shfaqjen e varianteve të reja të COVID-19, në Indi, Brazil dhe Afrikë të Jugut, rrezikun e bartjes së varianteve të reja nga udhëtimet prej këtyre shteteve, prandaj për parandalimin e ardhjes së varianteve të reja u vendos si më lart.