Masat e reja, Komiteti: Mbyllja nga ora 20:00-06:00, gjimnazet me mësim online…

Pas shtimit të dukshëm të infeksioneve me koronavirus, sot Komiteti Teknik i Ekspertëve ka vendosur të ashpërsoj masat për parandalimin e përhapjes së COVID-19. Kështu, duke filluar nga dita e nesërme, ora policore do të nisë në orën 20:00 dhe do vazhdoj ashtu siç ishte deri në orën 06:00 të mëngjesit, kohë kur nuk do të lejohet si lëvizja e qytetarëve ashtu dhe aktiviteti i bizneseve.

Ndërkohë për shkak të rritjes së rasteve të infektimeve të reja në grupmoshën 15-24 vjeç, Komiteti i Ekspertëve ka vendosur që të rikthej mësimin online në shkollat e mesme ndërsa sezoni i provimeve për universitetin do të zgjatet, për të siguruar kombinimin e provimeve online dhe në auditor.

Këto masa do të vijojnë për 14 ditë, deri më 25 shkurt, ditë kur Komiteti Teknik i Ekspertëve do të bëjë një rivlerësim të situatës.

Disa nga masat:

– Ndalimi i qarkullimit të lëvizjes për qytetarët nga ora 20:00 e mbrëmjes deri në 6:00 të mëngjesit, me përjashtim të emergjencave shëndetësore dhe për arsye pune (në këtë rast është e domosdoshme leja nëpërmjet aplikimit tek e-Albania) për një afat 14 ditor, duke filluar nga dita e enjte, datë 11 Shkurt – 25 Shkurt.

– Ndalimi i aktiviteteve të bareve, restoranteve, klubeve, nga ora 20:00 e mbrëmjes – 06:00 të mëngjesit (me përjashtim të shërbimit delivery), duke filluar nga dita e enjte, datë 11 Shkurt – 25 Shkurt.

– Nisur nga rritja e rasteve të infektimeve të reja në grupmoshën 15-24 vjeç, shkollat e mesme do të aplikojnë skenarin e tretë, pra atë online ne zonat e riskut të lartë, ku përfshihen bashkitë: Tiranë, Fier, Vlorë, Berat, Durrës, Gjirokastër, Lezhë, Lushnje, Pogradec dhe Kamëz, për periudhën 11 shkurt – 26 shkurt.

– Sezoni i provimeve për universitetin do të zgjatet, për të siguruar kombinimin e provimeve online dhe në auditor, për lëndët që kërkojnë prezencë, sipas vlerësimit të MASR, duke zbatuar rreptësisht protokollet AntiCovid.