Masat kundër COVID-19, Rama: Sa më fort të shtrëngohemi, aq më shpejt do të dalim nga ky rrethim i hekurt

Përmes një grafiku, sot Kryeministri Edi Rama ka sqaruar ecurinë e përhapjes së COVID-19 në Shqipëri, vendet tjera të rajonit dhe në botë ndërsa kërkoi nga qytetarët të bëjnë rezistencë në këtë situatë.

“Sa më fort të shtrëngohemi dhe rezistojmë sot, aq më e butë do jetë ngjitja e shigjetës së kuqe, aq më pak viktima e plagë të rënda do te kemi dhe aq më shpejt mund të fillojmë të dalim, pak nga pak, nga ky rrethim i hekurt në mbrojtje”, deklaroi sot Kryeministri Edi Rama.

Ndryshe, si masë për parandalimin e përhapjes së koronavirusit dhe pas paralajmërimit të ekspertëve se po hyjmë në javën vendimtare, Kryeministri Edi Rama ka ashpërsuar regjimin e lëvizjes, duke ndaluar plotësisht daljen e pensionistëve dhe duke kufizuar me leje-dalje vetëm një anëtar nga familje për pazar prej 60 minutave.