Masat për koronavirus, Ardi Veliu letër Drejtorive Vendore të Policisë: Mos lejoni grumbullimet e njerëzve!

Drejtori i Përgjithshëm i Policisë, Ardi Veliu, i ka dërguar letër 12 Drejtorive Vendore të Policisë ku kërkon zbatimin e masave për moslejimin e grumbullimeve masive në ambiente të hapura dhe të mbyllura, bazuar në Ligjin Nr.15/2016 “Për parandalimin dhe luftimin e e infeksioneve dhe sëmundjeve infektive” dhe Vendimin e Komitetit të Përkohshëm për infeksionin e përhapur nga koronavirusi si dhe Urdhrin Nr.132 të Ministrisë së Shëndetësi, “Për mbylljen e aktiviteteve publike dhe jopublike dhe anulimin e grumbulimeve masive në vende të mbyllura dhe të hapura.

Policia ka për detyrë të kontrollojë territorin dhe Ardi Veliu urdhëron Drejtoritë Vendore që të mos lejojnë grumbullimet e mëdha të njerzve në lokale, palestra, pube etj.

Po ashtu një tjetër urdhër i Veliut e ngarkon Policinë me përgjegjësinë që mos lejojë tifozët të futen në stadiume dhe të ndjekin ndeshje futbolli pasi ato do të luhen rregullisht por pa tifozë. Edhe pse koncertet, tubimet, manifestimet apo dëgjesat publike janë anuluar është detyrë e Policisë që të mos lejojë asnjë prej tyre.