Masat për zgjedhjet e 11 majit, misioni i OSBE/ODIHR takim me Prokurorin e Përgjithshëm dhe kreun e SPAK

Në ditën e hapjes së fushatës elektorale për zgjedhjet e 11 Majit, kreu i misionit vëzhgues të OSBE/ODIHR, Ambasadori Lamberto  Zannier ka zhvilluar takime në Prokurorinë e Posaçme, SPAK, dhe në Prokurorinë e Përgjithshme. 

Objekt i takimit të kreut të Misionit për Vëzhgimin e Zgjedhjeve të OSBE/ODIHR, Ambasadorit Lamberto  Zannier, me Prokurorin e Përgjithshëm, Olsian Çela, dhe kreun e SPAK, Altin Dumani, ishte informimi mbi masat e marra në lidhje me hetimin e veprave penale në fushën e zgjedhjeve, si dhe mundësitë e mbështetjes së punës së Misionit nga prokuroritë e juridiksionit të përgjithshëm.

Në kuadër të zgjedhjeve parlamentare të 11 majit 2025, në të gjitha prokuroritë e juridiksionit të përgjithshëm, janë ngritur seksione të posaçme të përkohshme, me në krye drejtuesit e prokurorive, të cilat do të mbështeten edhe nga Policia e Shtetit me oficerë të policisë gjyqësore si dhe nga një forcë operacionale.

Gjithashtu, në bazë të marrëveshjeve të lidhura, puna do të koordinohet me Komisionin Qendror të Zgjedhjeve dhe Prokurorinë e Posaçme, në drejtim të komunikimit të shpejtë të raportimeve mbi veprat penale, shkëmbimit të informacionit dhe koordinimit efikas të hetimeve.