Mashtrimet me Call Center, operacioni i SPAK: 10 të arrestuar, 2 pronar në kërkim

Nga kontrollet e SPAK dhe BKH të zhvilluara ditën e djeshme, 16 janar, në disa zyra “call center” në Tiranë, janë vënë në pranga 10 persona, ndërsa në kërkim janë shpallur dy pronarë të këtyre biznesve.

Hetimi që është kryer në bashkëpunim me autoritetet italiane ka përfshirë kontrollin e 6 kateve të kullës luksoze “Alban Tower”, pranë Gjykatës së Lartë.

Bëhet me dije se si pasojë e kontrolleve janë zbuluar disa prova materiale që mund të lidhen me aktivitet të paligjshëm, ndërsa kontrolli po vijon edhe sot, 17 janar, bashkë me marrjen në pyetje të disa personave të lidhur me çështjen.

Mësohet se veprimet janë realizuar me vendim të Gjykatës së Posaçme Kundër Korrupsionit dhe Krimit të Organizuar, GJKKO, firmosur nga prokurori Vladimir Mara.

SPAK nuk ka dhënë ende detaje mbi rezultatet e kontrolleve, ndërsa hetimi vazhdon.