“Mashtrimi i Bindjes Demokratike”/ Përgjigjet Patozi, PD: Gënjeshtër!
Pas denoncimit të Partisë Demokratike të mashtrimit të Sekretarit të Përgjithshëm të Kuvendit për llogari të “Bindjes Demokratike” duke bërë të ditur se ka bërë dhe kallëzim penal ndaj tij, reagon kreu i kësaj partie, Astrit Patozi jo duke folur për rastin në fjalë por duke sqaruar se kanë mbështetjen edhe të një deputeti:
“Sqarojmë publikun se Bindja Demokratike mbështetet jo nga një, por nga firmat e dy deputetëve për të garuar dhe kandiduar në gjithë Shqipërinë. Ata janë zotërinjtë Lefter Koka dhe Andi Përmeti, dhe për këtë ekziston e gjithë praktika e depozituar në KQZ. Më poshtë, fotokopja e shkresës së protokolluar,” ka sqaruar Astrit Patozi duke e bërë të qartë se Bindja Demokratike i ka kapur të gjitha afatet dhe detyrimet ligjore për të konkurruar në 26 bashki me kandidatë për kryetar dhe në rreth 55 të tilla për lista këshilli.
Por i menjëhershëm ka qenë reagimi i Partisë Demokratike duke e quajtur gënjeshtër deklaratën e kryetarrit të Bindjes Demokratike, Astrit Patozi, sepse
shërbëtori i bindur i Edi Ramës nuk zotëron një mandat deputeti në Kuvend dhe për pasojë duhet të kishte firma mbështetëse të qytetarëve për të regjistruar kandidatë në zgjedhje.
Reagimi i Partisë Demokratike:
Asnjë justifikim me deputetë fallco apo të marrë me qera nuk mund ta mbulojnë faktin se aktorët e Edi Ramës, të rregjistruar si kandidate me siglën e paligjshme të Bindjes Demokratike, janë gjithashtu të paligjshëm.
Shërbëtori i bindur i Edi Ramës nuk zotëron një mandat deputeti në Kuvend dhe për pasojë duhet të kishte firma mbështetëse të qytetarëve për të regjistruar kandidatë në zgjedhje.
Mbështetja nga një deputet që nuk është deputet i tij, si në rastin e Lefter Kokës, nuk ka vlerë ligjore. Partia “Bindja Demokratike” nuk ka 6 muaj që është krijuar e jo më të zotërojë për të paktën 6 muaj një mandat deputeti në Kuvend. Me apo pa parti e kandidatë fallco, votime moniste më 30 Qershor nuk ka për të patur!
