Mashtrimi i “Gulf”, gjykata vendos burg për administratorët. Ja emrat…
Për ish-menaxherin kryesor të kompanisë së naftës “Gulf”, Alban Aliko, Gjykata e Tiranës ka dhënë masën e “arrestit në burg” në mungesë.
Ky vendim vjen dy muaj pasi prokuroria e Tiranës ka nisur hetimet për skemën e mashtrimit disa milionë euro të kompanisë së naftës “Gulf” me shitjen e tollonave të naftës. Veç Alikos, caktimi i masës së “arrestit në burg” është dhënë dhe për administratorin e kompanisë, gjeorgjianin Irakli Svanidze.
Pas administrimit të shumë kallëzimeve penale dhe verifikimit në teren, burime pranë prokurorisë së Tiranës theksojnë se pak kohë më parë i janë drejtuar gjykatës së Tiranës, duke kërkuar caktimin e masës së “arrestit në burg”, për dy personat në fjalë, ndaj të cilëve njësia hetimore “Task-Forcë” po kryen hetime për akuzën e “Mashtrimit më shumë se një herë”. Tashmë dy personat, janë zyrtarisht në kërkim policor, pasi vendimi i gjykatës së Tiranës, i është dërguar policisë për ekzekutim, shkruan shqiptarja.com.
Sipas prokurorisë mashtrimi i qindra binzeseve dhe qytetarëve të ndryshëm me shitjen e tollonave, ka ndodhur brenda një periudhë katër ditore. Nga verifikimet e bëra prokuroria e Tiranës ka konstatuar se shitja e tollonave të naftës në masë të madhe dhe me çmim tepër të ulët që varionte nga 125 deri në 130 lekë për litër,ka nisur që prej datës 15 prill 2018.
Superoferta e “Gulf” ka vijuar të ekzistojë edhe për katër ditë të tjera, deri në datën 19 prill, kur gjithçka është ndaluar, ku një ditë më vonë shoqëria “Gulf” ka shpallur falimentin në të gjitha pikat e ushtrimit të aktivitetit të saj tregtar. Në fakt gjithçka duket se ka qënë e inskenuar, pasi jo pa qëllim dhe administratori i kompanisë “Sun Petroleum Albania” që kishte në pronësi karburantet e “Gulf”, në datën 18 prill 2018 ka dhënë dorëheqjen nga drejtimi i kësaj firme dhe është larguar jashtë shiqpërisë. Mësohet se brenda afatit 4 ditor në pikat e shitjes së naftës, janë shitur mijëra tollona, ndërkohë ka pasur biznese që kanë porositur deri në 20 milion lekë tollona.
