Maskat e skaduara, PD: Ministrja Manastirliu kallëzohet për 5 vepra penale

Pas denoncimit të djeshëm, sot Partia Demokratike ka kallëzuar penalisht Ministren e Shëndetësisë, Ogerta Manastirliu, dhe zyrtarët përgjegjës për shpërndarjen tek personeli shëndetësor të 1.2 milionë maskave të skaduara.

Kallëzimi i Partisë Demokratike, ku Ogerta Manastirliu akuzohet për 5 vepra penale, përfshirë shpërdorimin e detyrës, argumenton se Ministrja e Shëndetësisë është përfshirë në një veprimtari kriminale me pasoja të rënda për shëndetin e stafit mjekësor, duke urdhëruar shpërndarjen dhe përdorimin nga personeli mjekësor të maskave të skaduara prej dhjetorit 2011.

“Ky është një krim i rëndë shtetëror me përgjegjëse direkte ministren e Shëndetësisë, e cila është përfshirë në një operacion manipulimi për të marrë mbetjet spitalore që duhej të asgjësoheshin dhe për t’ia vënë në dispozicion stafit mjekësor,” thuhet në kallëzimin e Partisë Demokratike, të firmosur nga Sekretari i Përgjithshëm i PD, Gazment Bardhi, duke shtuar se Ministria e Shëndetësisë është përfshirë në një skenar kriminal të manipulimit, të fshehjes së vërtetës, duke vënë në dispozicion të mjekëve mbetje spitalore, në vend te asgjesimit të tyre.

Ndryshe, Partia Demokratike denoncoi dje qeverinë se shpërndau 1.2 milionë maska të skaduara për personelin shëndetësor. Kutitë me maskat e skaduara ishin një etiketë që mbulonte datën e skadencës, duke shkelur ligjin në mënyrë të dyfishtë.