MatchMaker Albania, Kryeministri Rama: Investime në turizëm, eksportet drejt objektivit 1 mld euro

Kryeministri Edi Rama, i pranishëm në edicionin e dytë të MatchMaker Albania, platforma e biznesit që bashkon investitorë, kompani dhe institucione vendase dhe ndërkombëtare, u ndal te zhvillimet ekonomike, duke deklaruar se prodhimet shqiptare kanë arritur në rreth 100 vende dhe se synimi i qeverisë është të çojë eksportet në 1 miliard euro.

Kreu i qeverisë u ndal edhe te turizmi, teksa shtoi se shumë shpejt do të prezantohen disa investime që synojnë të promovojnë jo vetëm destinacionet turistike, por edhe një model turizmi të një niveli tjetër të të kuptuarit e të të kujdesurit për qëndrueshmërinë.

“Ky panair ka katër fusha që reflektojnë në fakt thelbin e ndryshimit që modeli ynë ekonomik ka sjellë.

Së pari sigurisht është turizmi dhe projektet moderne urbane. Nga një vend i turizmit të aventurës për vetëm një apo dy muaj në vit dhe për një numër të kufizuar njerëzish, Shqipëria është tashmë një vend ku po ndodhin disa prej ndryshimeve më të mëdha, jo vetëm në kuptimin e shifrave, por në kuptimin e një portofoli shumë të larmishëm mundësish, që shkon nga turistët individualë të cilëve ju pëlqen të “humbin” në majat e maleve te grupet e mëdha të turistëve që duan të vijnë, të eksplorojnë kryeqytetin tonë, bregdetin tonë, luginat, liqenet, bujqësinë, agroturizmin tonë e kështu me radhë.

Dhe jemi shumë të lumtur të shohim që jo vetëm ambicia jonë, por edhe ambicia e atyre që kthejnë sytë nga Shqipëria si tokë mundësish, po rritet dita ditës.

Po përgatitemi që të prezantohen disa investime shumë të mëdha, të cilat janë në gamën e miliardave e miliardave dhe synojmë të promovojmë jo vetëm destinacionet turistike të Shqipërisë, por një turizëm të një profili tjetër, të një cilësie tjetër, të një niveli tjetër të të kuptuarit e të të kujdesurit për qëndrueshmërinë.

Shtylla e dytë është bujqësia inteligjente që shfaqet, a duket ende si një fushë sfiduese, por ku po ndodhin shumë gjëra e ku shumë produkte të prodhuara në Shqipëri po zhvillohen me shpejtësi mjaft të madhe. Prodhimet shqiptare tani më mbërrijnë në tryezat e rreth 100 vendeve në mbarë botën dhe ne besojmë fort se objektivi ynë për t’i çuar eksportet e këtij vendi të vogël në 1 miliardë euro është brenda mundësisë sonë.

E treta janë horizontet digjitale, teknologjia, inteligjenca artificiale, siguria kibernetike, ekonomia digjitale dhe jemi shumë krenarë që jemi vendi i parë që i ka lënë hapësirë edhe në qeveri një ministreje të Inteligjencës Artificiale, dhe po ecën shumë mirë, meqë ra fjala, dhe po bëhet gati të kthehet sërish në vëmendje me ca lajme tejet të mira.

Së fundi në radhë, por jo nga rëndësia aspak, energjia nga një sektor i cili për një kohë kaq të gjatë lidhej me kufizimet, me paqëndrueshmërinë, me varësinë nga kushtet natyrore, është bërë tashmë sektor që lidhet me diversifikimin, me vizionin afatgjatë, me novacionin”.

Ministrja e Ekonomisë dhe Inovacionit Delina Ibrahimaj evidentoi se Shqipëria paraqitet sot si një destinacion në rritje për investime, i mbështetur nga tregues të qëndrueshëm ekonomikë.

“Flukset e Investimeve të Huaja Direkte  kanë arritur në rreth 1.64 miliardë euro, ndërsa stoku total ka arritur në rreth 17 miliardë euro, duke reflektuar rritjen e besimit të investitorëve. Në të njëjtën kohë, Prodhimi i Brendshëm Bruto është dyfishuar në dekadën e fundit, duke arritur mbi 26.7 miliardë euro në vitin 2025, ndërsa investimet strategjike kanë tejkaluar 6 miliardë euro dhe kanë gjeneruar dhjetëra mijëra vende pune”, deklaroi Ibrahimaj.

Ajo theksoi se ky transformim mbështetet në përmirësimin e klimës së biznesit, në avancimin e digjitalizimit dhe në stabilitetin makroekonomik.

“Sot, mbi 1,200 shërbime publike ofrohen online, duke gjeneruar rreth 620 milionë euro kursime dhe duke reduktuar ndjeshëm kohën dhe kostot për qytetarët dhe bizneset, ndërsa borxhi publik është ulur në rreth 53% të PBB-së, duke garantuar një mjedis të qëndrueshëm për investime”, shtoi Ministrja.

Për të dytin vit radhazi në Tiranë zhvillohet MatchMaker Albania, i cili është kthyer në një vendtakim strategjik mes investitorëve, kompanive dhe institucioneve vendase dhe ndërkombëtare. Mbi 1.000 pjesëmarrës dhe më shumë se 400 takime të planifikuara nën organizimin e Agjencisë Shqiptare të Zhvillimit të Investimeve, AIDA, do të promovojnë Shqipërinë si destinacion të besueshëm dhe inovativ për investime./Monitor/