Mazhoranca: Nuk tërhiqemi! Ambasadori i BE: Opozita nuk kthehet pas, kjo është për të ardhur keq!

Edhe një ditë pasi Sekretari i Përgjitshëm i Partisë Socialiste, Taulant Balla, e bëri të qartë nga Asambleja e PS në Pogradec se kishte vajtur atje për “t’ju thënë se ne nuk tërhiqemi, se jemi të gatshëm të dialogojmë me atë çfarë ka mbetur nga opozita në degradim”, Ambasadori i Bashkimit Europian në Shqipëri, Luigi Soreca, akuzon opozitën se po mban qëndrim pa u kthyer pas dhe kjo, sipas tij, është për të ardhur keq:

“Situata është e paprecedent, kemi folur me të dyja palët. Jemi takuar me qeverinë si dhe opozitën. Opozita po mban qëndrim pa u kthyer pas dhe kjo është për të ardhur keq. Ja kemi thënë disa herë këtë gjë por pa sukses.Kjo ndikon në integrimin e Shqipërisë. Ne kemi kërkuar dialog dhe jemi të paanshëm.  Ne i kemi kërkuar qeverisë që të dialogojmë,” tha i shqetësuar Ambasadori Soreca ashtu si edhe BE në vitin 2016, jo për drogën e Edi Ramës që ka pushtuar Shqipërinë por për integrimin e saj evropian:

“Në rast të moszgjidhjes të këtij ngërçi, integrimi i Shqipërisë është në rrezik. Ftoj institucionet të luajnë rolin e tyre në demokraci, të kujdesen për interesat e banorëve. I bëjmë thirrje të gjitha palëve të marrin pjesë në zgjedhjet vendore si e vetmja mënyre demokratike.”

Në fund, duke përsëritur refrenin evropian edhe nga Shkodra, se BE mbështet interesat e qytetarëve të Shqipërisë dhe se situata në vend minon këtë dëshirë të 93 % të qytetarëve shqiptarë, Ambasadori Luigi Soreca nuk qartësoi nëse statistikat e Bashkimit Evropian që ai citon, flasin edhe për mbështetjen e 93 % të shqiptarëve për krimin e organizuar, apo pak rëndësi ka nëse ata janë kundër drogës, projekteve korruptive me ose pa PPP, dhe kryeministër Edi Ramën, i cili nuk shkon dot as në Roskovec dhe do ta çoj Shqipërinë në Bruksel me, siç thotë Taulanti, atë çfarë ka mbetur nga opozita në degradim!