“Mazhoranca organizatë kriminale”/ Përgjigje Metës, Rama: Turp dhe sëkëlldi!

Në përfundim të takimit me drejtuesit politikë të Partisë Socialiste dhe një ditë pasi Iliri Meta e cilësoi mazhorancën një organizatë kriminale, Kryeministri Edi Rama tha se është e turpshme dhe sëkëlldisëse që të kemi një individ në zyrën e Presidentit të Republikës, që ka dalë komplet nga të gjitha shinat e funksionit të tij. Me këtë rast ai foli edhe për zgjedhjet e 25 prillit 2021 dhe strategjinë rilindase.

“Është vërtet fatkeqësi që përshkallëzimi i dhunës verbale dhe marrëzisë nga ana e Ilir Metës po ndodh shumë përpara kohe në një kuptim, nuk e di ku do shkojë kaq herët sa ka filluar. Nuk është hera e parë, por realisht është e turpshme dhe sëkëlldisëse që të kemi një individ në zyrën e Presidentit të Republikës që ka dalë komplet nga të gjitha shinat e funksionit të tij dhe ka vendosur vetën dhe institucionin në funksion të një force të degraduar, siç është partia prej të cilës vjen dhe drejt së cilës shkon, është vërtet për të ardhur keq,” tha Edi Rama ndërsa foli edhe për paralajmërimin e Ambasadores amerikane, Yuri Kim, se deri në fund të vitit duhet të plotësohen vendet vakante në Gjykatën Kushtetuese dhe funksionalizimin e saj.

“Nuk ka asnjë detyrë të drejtpërdrejtë qeveria në këtë drejtim, sepse sistemi është i pavarur prej nesh, por në dijeninë time janë të gjitha mundësitë që ne si parlament, si vend, ta çojmë përpara këtë proces. Shpresojmë që procesi të vazhdojë normalisht dhe vendet të plotësohen sipas të gjitha rregullave dhe procedurave.”

Për zgjedhjet e 25 prillit 2021, që ishte dhe qëllimi i takimit me drejtuesit politikë të Partisë Socialiste, Kryeministri Edi Rama është e bindur se skuadra e tij do të ketë eksperiencën dhe energjinë e re.

“Kemi mbi 50 të rinj e të reja që duan të na bashkohen në skuadrën tonë të 2021. Skuadra jonë do të jetë një skuadër që do të ketë edhe eksperiencën, edhe energjinë e re.”