Mbahet forumi Shqipëri-Turqi 2025, ftohen investitorët turq të ridyfishojnë investimet

Me pjesëmarrjen e mbi 500 investitorëve turq, në Tiranë kanë nisur punimet e Forumit të Investimeve Shqipëri–Turqi 2025, një event i rëndësishëm ekonomik që synon forcimin e marrëdhënieve tregtare dhe nxitjen e investimeve të reja mes dy vendeve.
Nëpërmjet një video-mesazhi të drejtuar pjesëmarrësve, Kryeministri Edi Rama vlerësoi marrëdhëniet shqiptaro-turke dhe ritheksoi angazhimin e qeverisë për të mbështetur çdo investim të huaj, veçanërisht nga partnerët strategjikë si Turqia.
“Dhjetë vjet më parë, me Presidentin Recep Tayyip Erdogan, vumë një objektiv të thjeshtë: Të dyfishonim shkëmbimet tona tregtare. Sot, kemi shkuar shumë përtej.
Nga 250 milionë euro, në mbi 1 miliard vetëm në 9 muajt e parë të këtij viti. Nga 300 sipërmarrje me kapital turk, në mbi 1 mijë sot. Nga disa qindra punonjës, në 15 mijë të tillë, që punojnë në sipërmarrjet turke në vendin tonë.
Por çka vlen më shumë se numrat, është fryma, është dëshira, është sensi i përkatësisë në këtë miqësi që ka ndërtuar këtë lidhje: një frymë besimi, një frymë respekti, një frymë bashkëpunimi që prodhon rezultat. Shqipëria sot nuk është më ishulli i mbyllur që dikur e përshkruanin.
Shqipëria sot është një vend i hapur, një ishull i bukur mundësish, një ishull ku mund të shumëfishosh investimin tënd dhe jo në shumë, në pak vite. Me taksa fare të ulëta, me energji të gjelbër, me një turizëm në rritje, me teknologji që zhvillohet përditë dhe me një treg që e pret krahëhapur sipërmarrjen turke.
Vetëm këtë vit, 300 mijë turistë nga Turqia zgjodhën Shqipërinë, kjo është e jashtëzakonshme po të mendosh se jo shumë vite më parë, ata numëroheshin me gishtat e dorës. Oreksi vjen duke ngrënë thotë përsëri një fjalë që e kemi të përbashkët – ndaj, ejani, – ejani të punojmë bashkë për suksesin, ta rrokim atë dhe ta shijojmë bashkërisht.
Shqipëria është sot porta më e afërt e Turqisë drejt Bashkimit Europian. Shqipëria është sot një partner i qëndrueshëm në siguri, në energji, në turizëm dhe në teknologji.
Qeveria shqiptare, më shumë se sa një qeveri mike, e një vendi mik, është një partnere strategjike i një vendi të lidhur në një aleancë strategjike me Turqinë.
Shqipëria sot, ka një qeveri që është gati të mikpresë, të dëgjojë, të ndihmojë dhe të garantojë çdo investim që të kthehet në histori suksesi Ne e hodhëm një hap 10 vjet më garantojë çdo investim që të kthehet në histori suksesi. Ne e hodhëm një hap 10 vjet më parë dhe sot shohim distancën që kemi krijuar me të shkuarën falë këtij hapi të hedhur.
Madje sot, kemi një urë, një urë me këmbët ngulur fort në të ardhmen dhe objektivi është që të ridyfishojmë shkëmbimet tona tregtare dhe nesër të ndërtojmë një autostradë suksesi midis Bosforit dhe Adriatikut, sepse kjo marrëdhënie nuk është thjesht ekonomi, kjo marrëdhënie është vëllazëri, është besim, është një bashkë udhëtim drejt të ardhmes”, nënvizoi kryeministri Edi Rama.
Forumi synon të nxjerrë në pah mundësitë e investimit në katër sektorë me potencial të lartë zhvillimi, si: Ndërtimi; Teknologjia e Informacionit dhe Komunikimit / BPO; Turizmi; Bujqësia dhe Industria Ushqimore
Drejtoresha ekzekutive e AIDA-s, Laura Saro u shpreh se ky forum është një platformë e rëndësishme për promovimin e potencialeve të Shqipërisë si destinacion i qëndrueshëm investimi dhe për forcimin e lidhjeve ekonomike mes dy vendeve.
Përveç paneleve diskutimi, forumi do të zhvillojë takime direkte midis bizneseve, B2B, dhe bizneseve me institucione, B2G, duke krijuar hapësira konkrete për marrëveshje, bashkëpunim dhe shkëmbim përvojash./Monitor/