Mbahet koncerti inaugurues i Operës së Kosovës
Mbrëmjen e së dielës në Sallën e Sporteve në Pallatin e Rinisë, në Prishtinë është mbajtur koncerti inaugurues i Operës së Kosovës.
Për koncertin inaugurues të Operës së Kosovës u bën bashkë mbi 170 profesionistë të muzikës që veprojnë suksesshëm në skena të ndryshme botërore.
Në mesin e të ftuarve ishin kryeministri i Kosovës, Albin Kurti, ministri i Kulturës, Rinisë dhe Sportit, Hajrulla Çeku e shumë personalitete të njohura.
Ky institucion i rëndësishëm e i sapothemeluar e nisi programin me vënien në skenë të operës “Goca e Kaçanikut ” nga kompozitori ynë i madh, Rauf Dhomi, nën dirigjimin e Edon Ramadanit, thekson përmes rrjetit social Facebook, ministri i Kulturës, Hajrulla Çeku.
“Ky është fillim i mbarë për një rrugëtim të gjatë dhe shpresëdhënës të muzikës operistike në Kosovë. Sonte shteti ynë bëri një hap të ri e të rëndësishëm në aspektin institucional kulturor, e teksa për dekada me radhë janë formuar artistë të shkëlqyer të këtij arti të cilët kanë shkëlqyer nëpër teatrot operistikë anembanë botës, tash e tutje ata do ta kenë mundësinë të shfaqen edhe në vendin e tyre. Ne përherë kemi patur dhe vazhdojmë të kemi muzikantë të talentuar e punëtorë, virtuozë të mediumit muzikor. Tash do të presim prej tyre të shpërthejnë në sallat e koncerteve me pasion dhe gëzim për të ndarë muzikën dhe për t’u kujdesur për njëri-tjetrin me art dhe kulturë,” tha Çeku duke falenderuar të gjithë ata që punuan me aq përkushtim që kjo natë të na sjellë kaq shumë pozitivitet e energji të mirë.
Ndryshe, në mesin e të ftuarve ishin Presidentja e Kosovës, Vjosa Osmani, kryeministri i Kosovës, Albin Kurti, ministri i Kulturës, Rinisë dhe Sportit, Hajrulla Çeku si dhe shumë personalitete të njohura të kulturës, artit, dhe politikës.
