Mbërrijnë 35.100, Blinken: Kosovës do ti dhurojmë 500 mijë vaksina Pfizer
Pasi mbërritën 35.100 doza të vaksinës Pfizer në Kosovë si donacion i SHBA, Sekretari amerikan i Shtetit, Antony Blinken, sqaroi se ky është kontigjenti i parë i 500 mijë dozave Pfizer që pritet të dhurohen për Kosovën nga Shtetet e Bashkuara.
“Sot SHBA dhuroi kontigjentin e parë të 500 mijë dozave Pfizer për Kosovën, duke e sjellë 20 përqind më afër synimin për vaksinim. Dorëzuar përmes COVAX, kjo dhuratë përfaqëson vlerat e përbashkëta dhe lidhjet e palëkundura mes popujve tanë,” thekson Antony Blinken përmes rrjetit social Twitter.
Në ceremoninë e organizuar në Prishtinë, pas arritjes së këtij kontingjenti, Ambasadori amerikan në Prishtinë, Philip Kosnett, rikujtoi se vendi i tij është donatori më i madh i COVAX-it ku ka kontribuar me 2 miliardë dollarë.
“Kjo dhuratë nga populli amerikan është donacioni më i madh i vaksinave që Kosova ka marrë nga ndonjë shtet i vetëm apo organizatë,” tha Philip Kosnett duke i bërë thirrje qytetarëve të Kosovës të vaksinohen, pasi sipas tij, vetëm së bashku mund ta mposhtim COVID-19.
Ndërsa Presidentja Vjosa Osmani tha se me këtë rast se në mars i kishte shkruar Presidentit të SHBA, Joe Biden për t’i vaksina kërkuar për Kosovën.
“Vlera e këtij donacioni vaksinash shkon përtej numrave. Sot triumfon solidariteti dhe rikonfirmohet edhe miqësia e fortë ndërmjet Shteteve të Bashkuara dhe Republikës së Kosovës. Ky veprim është vula e shprehjes sonë popullore se ‘miku i mirë shihet në ditë të vështira’”, tha Osmani ndërsa Kryeministri Albin Kurti shtoi:
“Vendi ynë është mirënjohës dhe falënderues për mbështetjen e vazhdueshme dhe solidaritetin nga të gjithë e veçanërisht nga miqtë dhe aleatët tanë: Shtetet e Bashkuara të Amerikës. Po përballemi me një pandemi të vështirë, zgjidhja përfundimtare e së cilës është vaksinimi.”
Ndryshe, deri më tani, në Kosovë 227.581 persona janë vaksinuar plotësisht, me të dy dozat e vaksinës ndërsa numri i përgjithshëm i dozave të administruara është 666.476.
